عمران خان مہاتیر محمدمشترکہ پریس کانفرنس،مزاکرات،گارڈ آف آنر

اسلام آباد(ویب ڈیسک )وزیراعظم عمران خان نے کرائسٹ چرچ حملے کو اسلامو فوبیا کا نتیجہ قرار دیتے ہوئے فوبیا کے خاتمہ پر زور دیاہے۔

وزیراعظم عمران خان اور مہاتیر محمد کے درمیان وزیراعظم ہاوٴس میں ملاقات ہوئی جس میں باہمی دلچسپی کے امور، تجارت اور دونوں ملکوں کے تعلقات پر بات چیت کی گئی۔

عمران خان اور ملائیشین وزیراعظم مہاتیر محمد کی قیادت میں دونوں ملکوں کے وفود کی سطح پر بھی مذاکرات ہوئے جس کے بعد دونوں وزرائے اعظم نے مشترکہ پریس کانفرنس کی۔

عمران خان نے کہا کہ اسلامو فوبیا نے مسلم امہ کو نقصان پہنچایا، دہشت گردی نے مسلم ممالک کو بہت متاثر کیا، کرائس چرچ حملہ بھی اسلامو فوبیا کا نتیجہ ہے، دنیا میں جان بوجھ کر اسلامو فوبیا کی ترغیب دی گئی۔

وزیراعظم نے کہا کہ مہاتیر محمد کا بدعنوانی کے خلاف موٴقف قابل تعریف ہے، بدعنوانی انسانی ترقی کی راہ میں سب سے بڑی رکاوٹ ہے اور کسی بھی ملک کو کمزور کردیتی ہے۔

انھوں نے کہا ڈاکٹر مہاتیر محمد کا دورہ پاکستان کے لیے اعزاز ہے، انہیں مسلمانوں کے قائد کی حیثیت سے دیکھتے ہیں، مہاتیر محمد کے قائدانہ کردار کے متعرف ہیں، ملائشیا مسلم دنیا کے لیے ماڈل کے طور پر ابھرا۔

اس موقع پر معزز مہمان ڈاکٹر مہاتیر محمد نے کہا کہ پاکستان آمد پر بے انتہا خوش ہوں اور یوم پاکستان کی تقریب میں شرکت میری لیے اعزاز کی بات ہے۔

انہوں نے کہاکہ وزیراعظم عمران خان سے دونوں ممالک کے درمیان دوطرفہ تعلقات پر بات چیت ہوئی، مسلم امہ کو درپیش مسائل پر وزیراعظم عمران خان سے بات ہوئی ، تجارت میں اضافے کے لیے اقدامات کے حوالے سے تبادلہ خیال ہوا۔

پاکستان ملائیشیا کے درمیان براہ راست سرمایہ کاری پر بھی بات ہوئی، معیشت اور تجارت میں بہتری کے لیے مل کر کوششیں کریں گے۔

مہاتیر محمد کا کہنا تھا کہ بدعنوانی کے حوالے سے بہت تشویش ہے، کرپشن کے خاتمے سے متعلق پاکستان ہمارے تجربات سے استفادہ کرسکتاہے ۔

انھوں نے کہا انتہا پسندی کے خاتمے کے لیے کاوشیں کرنی ہوں گی، اسلامو فوبیا کے خاتمے کے لیے بھی کوششیں کرنا ہوں گی۔

قبل ازیں ملائیشیا کے وزیراعظم مہاتیر محمد کے اعزاز میں وزیراعظم ہاوٴس میں استقبالیہ دیا گیا، ملائیشین وزیراعظم مہاتیر محمد کے وزیراعظم ہاوٴس پہنچنے پر عمران خان نے معزز مہمان کا استقبال کیا۔

وزیراعظم ہاوٴس میں پاک فوج کے چاق و چوبند دستوں نے معزز مہمان کو گارڈ آف آنر پیش کیا اور مہاتیر محمد نے پریڈ کا معائنہ بھی کیا جب کہ اس موقع پر دونوں ملکوں کے قومی ترانوں کی دھنیں بھی بجائی گئیں۔

گارڈ آف آنر کے بعد معزز مہمان نے وزیراعظم ہاوٴس میں پودا لگایا جس کے بعد عمران خان نے مہاتیر محمد کا کابینہ ارکان سمیت دیگر سینئر حکام سے تعارف کرایا، ملائیشین وزیراعظم نے بھی اپنے پاکستانی ہم منصب کا اپنے وفد سے تعارف کرایا۔

ملائیشیا کے وزیراعظم مہاتیر محمد تین روزہ دورے پر پاکستان پہنچے ہیں وہ یومِ پاکستان کی پریڈ کے مہمان خصوصی ہوں گے

0Shares

Comments are closed.