وزارت داخلہ نے ہری پور سمیت 13 حلقوں میں انتخابات کے دوران فوج تعینات کرنے کا نوٹیفکیشن جاری دیا

فوٹو : فائل

اسلام آباد : وزارت داخلہ نے ہری پور سمیت 13 حلقوں میں انتخابات کے دوران فوج تعینات کرنے کا نوٹیفکیشن جاری دیا ، 23 نومبر کے ضمنی انتخابات کے لیے پاکستان آرمی، سول آرمڈ فورسز اور مقامی پولیس کی تعیناتی کا نوٹیفکیشن جاری  کیا گیا ہے، جبکہ الیکشن کمیشن آف پاکستان نے نامزد عسکری اور سول افسران کو مجسٹریٹ درجہ اول کے اختیارات بھی تفویض کر دیے ہیں۔ اس فیصلے کا مقصد انتخابی عمل کے دوران امن و امان کو یقینی بنانا، کسی بھی ناخوشگوار واقعے کی روک تھام اور فوری کارروائی کے لیے مؤثر رسپانس میکانزم فراہم کرنا ہے۔

وزارتِ داخلہ کے جاری کردہ نوٹیفکیشن کے مطابق ضمنی الیکشن کے روز عام فورسز دوسرے درجے (Second Tier) پر بطور کوئیک ری ایکشن فورس تعینات رہیں گی، جبکہ پاک فوج تیسرے درجے (Third Tier) میں کوئیک ری ایکشن فورس کے طور پر خدمات انجام دے گی۔ یہ تعیناتی انتخابی دن کے دوران کسی بھی ہنگامی صورتحال میں فوری رسپانس کو یقینی بنانے کے لیے کی گئی ہے۔

دوسری جانب الیکشن کمیشن نے بھی انتخابی عمل کے دوران امن و امان برقرار رکھنے کے لیے آرمی، رینجرز، ایف سی، پولیس اور دیگر سول آرمڈ فورسز کی تعیناتی کا باضابطہ نوٹیفکیشن جاری کیا ہے۔ نامزد افسران کو مجسٹریٹ درجہ اول کے اختیارات دینے سے انہیں ضابطہ فوجداری کے تحت فوری کارروائی اور موقع پر صورتِ حال کو کنٹرول کرنے کا مکمل اختیار حاصل ہوگا۔

نوٹیفکیشن کے مطابق 22 تا 24 نومبر کے دوران پاک فوج اور سول آرمڈ فورسز کو اسٹینڈ بائی/ ریسپانس موڈ میں رکھا جائے گا، جبکہ رینجرز کو تیسری دفاعی پرت (Third Layer) پر فوری ردعمل یونٹس کے طور پر تعینات کیا جائے گا۔ مقررہ مدت کے دوران افسران کسی بھی خلاف ورزی، ہنگامی صورتحال یا جرم کے ارتکاب کی صورت میں فوری اور مؤثر کارروائی کر سکیں گے۔

نوٹیفکیشن میں یہ بھی واضح کیا گیا ہے کہ تعینات فورسز کو انسدادِ دہشت گردی ایکٹ (ATA) کے تحت مکمل اختیارات حاصل ہوں گے تاکہ انتخابی مراحل کے دوران کسی بھی قانون شکن سرگرمی، ہنگامہ آرائی یا رکاوٹ کو بروقت روکا جا سکے اور پولنگ کا عمل شفاف اور پرامن ماحول میں مکمل ہو۔

انتخابات کے دوران فورسز کی تعیناتی درج ذیل حلقوں میں کی جائے گی:
PP-115 فیصل آباد، PP-116 فیصل آباد، PP-269 مظفرگڑھ، NA-185 ڈیرہ غازی خان، NA-18 ہری پور، PP-73 سرگودھا، NA-96 فیصل آباد، NA-104 فیصل آباد، NA-143 ساہیوال، PP-98 فیصل آباد، PP-203 ساہیوال، NA-129 لاہور اور PP-87 میانوالی۔

ضمنی انتخابات، وزارت داخلہ نوٹیفکیشن، الیکشن کمیشن پاکستان، پاک فوج تعیناتی، رینجرز تعیناتی، مجسٹریٹ درجہ اول اختیارات، 23 نومبر الیکشن، انتخابی سیکیورٹی، امن و امان پلان، فیصل آباد ضمنی الیکشن، سیکیورٹی فورسز پاکستان، انتخابی ضابطہ فوجداری، انسداد دہشت گردی ایکٹ اختیارات، اسٹینڈ بائی موڈ فورسز، پولیس اور آرمی تعیناتی