عدالت کا بشریٰ بی بی کی جانب سے دائر درخواست پر ان کا طبی معائنہ کرنے کا حکم

فائل:فوٹو
احتساب عدالت نے 190 ملین پاوٴنڈ ریفرنس کی سماعت 19 اپریل تک ملتوی کر دی۔ بشریٰ بی بی کی جانب سے دائر درخواست پر عدالت نے کل 12 بجے تک ڈاکٹر عاصم یونس سے ان کا طبی معائنہ کرنے کا حکم بھی دیدیا۔

190 ملین پاوٴنڈ ریفرنس پر سماعت احتساب عدالت اسلام آباد کے جج ناصر جاوید رانا نے کی۔ آج سماعت کے دوران نیب کی جانب سے مزید 9 گواہان کو پیش کیا گیا ابتک مجموعی طور پر 15 گواہان کے بیانات قلمبند جبکہ 13 گواہوں پر جرح مکمل کر لی گئی، عدالت نے آئندہ سماعت پر مزید چھ گواہان کو بھی طلب کر لیا۔

سماعت کے موقع پر بانی پی ٹی آئی اور بشریٰ بی بی کمرہ عدالت میں موجود تھے، نیب کے ڈپٹی پراسیکیوٹر جنرل سردار مظفر عباسی اور پراسیکیوٹر امجد پرویز ٹیم کے ہمراہ عدالت میں پیش ہوئے جبکہ بانی پی ٹی آئی اور بشریٰ بی بی کے وکلاء ظہیر عباس چودھری، عثمان گل اور بیرسٹر علی ظفر پیش ہوئے۔

دوران سماعت بشریٰ بی بی کی جانب سے عدالت میں طبی معائنے کی درخواست دائر کی گئی جسے منظور کر لیا گیا۔