0
0
کراچی ( سپورٹس ڈیسک)پشاور زلمی کے بیٹسمینوں نے زبردست بیٹنگ کرکے 194اتنا پہاڑ ٹوٹل 19اووز میں پورا کرکے میچ 6وکٹوں سے جیت لیا۔
پی ایس ایل کے پانچویں میچ میں پشاور زلمی نے ملتان سلطانز پہلے بیٹنگ کرتے ہوئے 4ہی وکٹوں کے نقصان پر193رنز بنائے تھے ، جواب میں چند اچھی اننگز نے میچ کو اپنے ہاتھ میں کرلیا خاص کرفاتح ٹیم کے ٹام کڈمور کی نصف سنچری نے فتح میں اہم کردار ادا کیا۔
پشاور زلمی کی طرف سے اننگز کا آغاز کامران اکمل اور امام الحق نے کیا، دونوں نے جارحانہ انداز میں بیٹنگ کرتے ہوئے سکور کو آگے بڑھایا، اس دوران کامران اکمل نے چند دلکش شاٹس کھیلے تاہم ان کو37کے انفرادی سکور پر عثمان قادر نے ایل بی ڈبلیو کردیا۔
اوپنر بیٹسمین امام الحق 39 گیندوں پر 48 رنز بنا کر رن آؤٹ ہو گئے۔ ردر فورڈ 6 گیندوں پر 15 رنز بنا کر شاہنواز دھانی کا شکار بن گئے، ٹام کڈمور نے 31 گیندوں پر نصف سنچری مکمل کی اور 53سکور پر شاہنواز کو وکٹ دے بیٹھے۔
پشاور زلمی کی ٹیم نے ہدف 19 ویں اوورز کی آخری گیند پر حاصل کیا۔ شعیب ملک 11 اور حیدر علی 25 رنز کیساتھ ناٹ آؤٹ رہے۔ شاہنواز دھانی نے دو وکٹیں حاصل کیں۔
ملتان سلطانز نے اس سے قبل ٹاس ہارنے کے بعد پہلے بیٹنگ کی،ملتان سلطانز کی طرف سے اننگز کا آغاز کپتان محمد رضوان اور کرس لائن نے کیا جبکہ پشاور زلمی کی طرف سے پہلا اوور محمد عمران جونیئر نے کیا۔
پہلے کھیلنے والی ٹیم ملتان سلطانز کا آغاز اچھا نہ تھا، محمد عرفان نے کرس لائن کو دوسرے ہی اوور میں چلتا کیا ۔ آسٹریلوی بیٹسمین 1 سکور بنا سکے، سلپ پر حیدر علی نے شاندار کیچ تھاما۔ کپتان محمد رضوان 28 گیندوں پر 41 سکور بنا کر پویلین لوٹ گئے۔
پشاور زلمی کے محمد عمران جونیئر کی گیند پر امام الحق نے کیچ پکڑا۔مڈل آرڈر بیٹسمین صہیب مقصود اور جیمز وینس نے زبردست انداز میں بیٹنگ کی اور وکٹ کے چاروں اطراف شارٹس کھیلے، دونوں کے درمیان 50 رنز کی پارٹنر شپ 29 گیندوں پر بنی۔
صہیب مقصود نے 21 گیندوں پر 36 رنز بنا کر ایک باونسر کو ہک کرنے کی کوشش میں وکٹ کیپر کو کیچ دے بیٹھے، جیمز وینس 84 سکور کی جارحانہ باری کھیلی ، ان کو ثاقب محمود نے آوٹ کیا۔
ریلی روسو 14 اور خوش دل شاہ 6 رنز بنا کر ناٹ آؤٹ رہے، ملتان سلطانز نے مقررہ اوورز میں 193 رنز بنائے جو بظاہر وننگ ٹوٹل لگ رہا تھا لیکن پشاور زلمی نے بڑی آسانی سے پورا کرلیا۔
زلمی کے ثاقب محمود نے دو، محمد عمران، محمد عرفان نے ایک ایک وکٹ حاصل کی۔ وہاب ریاض ہمیشہ کی طرح مہنگے باولر ثابت ہوئے، اور انھیں 4 اوورز میں 51 رنز کی پٹائی برداشت کرنا پڑی۔
