کامسیٹس،چین اورپاکستان کی کمپنیوں میں 4 شعبوں میں مفاہمت پر دستخط

فوٹو : پی آر

اسلام آباد : کامسیٹس،چین اورپاکستان کی کمپنیوں میں 4 شعبوں میں مفاہمت پر دستخط کئے گئے ہیں، مفاہمت میں الیکٹرک گاڑیوں، گرین انرجی، جدید زراعت اور تربیت کے شعبوں میں باہمی تعاون کیا جائے گا.

چین کے آئی بی آئی انٹرنیشنل گروپ کمپنی لمیٹڈ، اور پاکستان کی ٹیکنالوجی کمپنی ایجیکو پرائیویٹ لمیٹڈ کے درمیان ایک سہ فریقی تاریخی مفاہمت کی یادداشت پر دستخط کیے گئے ہیں۔

مفاہمت کے تحت فریقین چار اہم شعبوں میں تعاون کریں گے: الیکٹرک گاڑیاں، قابلِ تجدید توانائی، جدید (پریسیژن) زراعت، اور تربیت و صلاحیت سازی۔ اس تعاون میں مہارت کا تبادلہ اور ٹیکنالوجی کی منتقلی شامل ہے۔ یہ شعبے ماحولیاتی تبدیلی، توانائی کے بحران، خوراک کے تحفظ اور جدید سائنسی حلوں کی عالمی ضرورت کے پیشِ نظر نہایت اہم ہیں۔

اقوامِ متحدہ کے کئی پائیدار ترقی کے اہداف (SDGs) سے ہم آہنگ ہے، جن میں صاف اور سستی توانائی (SDG 7)، صنعت و جدت (SDG 9)، اور ماحولیاتی تحفظ (SDG 13) شامل ہیں۔

تقریب میں ڈین آف ڈپلومیٹک کور، ترکمانستان کے سفیر، کے ساتھ اردن، شام، مراکش، یمن، ایتھوپیا کے سفراء، اور ایران و آذربائیجان کے سفارتی نمائندگان شریک ہوئے۔ دیگر معزز مہمانوں میں چیئرمین آئی پی او پاکستان، سفیر عامر امیل، اور آئی بی آئی کے مشیر، سفیر معین الحق شامل تھے۔

کامسیٹس کے ایگزیکٹو ڈائریکٹر، سفیر ڈاکٹر نفیس ذکریا نے بانی رکن پروفیسر عبدالسلام کو خراجِ عقیدت پیش کرتے ہوئے تنظیم کے وژن کو سراہا۔ انہوں نے کہا کہ کامسیٹس سائنسی علم کو عملی حل میں ڈھالنے کے لیے پُرعزم ہے۔

انہوں نے ایجیکو کے سی ای او، انجینئر اسلم آزاد کی مقامی طور پر تیار کردہ الیکٹرک گاڑیوں کی ٹیکنالوجی کو سراہا، جو ٹرانسپورٹ کے شعبے میں کاربن کے اخراج پر قابو پانے کی کوشش ہے۔ انہوں نے نینو ٹیکنالوجی لیب اور ٹیلی ہیلتھ کلینکس کے قیام کو بھی رکن ممالک کے لیے اہم کامیابی قرار دیا۔

آئی بی آئی گروپ کے چیئرمین، جناب ابراہیم منیر نے توانائی، تجارت، صحت، دفاع، زراعت، ای پی سی اور اسمارٹ ٹیکنالوجی سمیت مختلف شعبوں میں ادارے کی مہارت پر روشنی ڈالی۔

انہوں نے گروپ کے فلیگ شپ منصوبے “بیلٹ اینڈ روڈ اکنامک اینڈ ٹریڈ سینٹر (BRETC)” کا خاص طور پر ذکر کیا، جو بیلٹ اینڈ روڈ انیشی ایٹو کے تحت علاقائی تعاون اور روابط کو فروغ دیتا ہے۔

مفاہمت میں شامل شعبوں نے سفارتکاروں کی خاص دلچسپی حاصل کی، اور انہوں نے کامسیٹس کی قیادت میں کیے گئے اقدامات کو سراہا۔

کامسیٹس ایک بین الحکومتی تنظیم ہے جو 1994 میں قائم ہوئی، جس کے 27 رکن ممالک اور 25 مراکزِ فضیلت ہیں۔ اس کا سیکرٹریٹ اسلام آباد میں قائم ہے۔

آئی بی آئی انٹرنیشنل گروپ، 2015 میں چین کے شہر سوزو میں قائم ہوا اور کئی شعبہ جات میں عالمی سطح پر سرگرم ہے۔

ایجیکو پرائیویٹ لمیٹڈ پاکستان میں گرین ٹیکنالوجی کی ایک ممتاز کمپنی ہے، جو "اکانومیا” کے برانڈ کے تحت شمسی توانائی سے چلنے والی الیکٹرک گاڑیاں تیار کرتی ہے، اور اس کی کئی اختراعات قومی سطح پر رجسٹرڈ اور منظور شدہ ہیں۔