باکسر عامرخان کے بعد کشمیریوں سے یکجہتی کےلیے شاہدآفریدی بھی میدان میں

اسلام آباد(ویب ڈیسک)قومی کر کٹ ٹیم کے سابق کپتان اور آل راؤنڈر شاہد خان آفریدی نے بھارتی ظلم و جبر کے شکار کشمیریوں سے اظہارِ یکجہتی کیلئے اپنا منصوبہ پیش کردیا۔

دودن قبل پاکستانی نژاد برطانوی باکسر عامر خان نے بھی کشمیریوں سے اظہار یکجہتی کیلئے لائن آف کنٹرول کا دورہ کیا تھا اور بھارتی مظالم کی مذمت کی تھی۔

اب پاکستان کے اسٹار کرکٹر شاہد خان آفریدی نے بھی کشمیریوں کی حمایت کیلئے اپنا منصوبہ پیش کردیا ہے۔ سماجی رابطوں کی ویب سائٹ ٹوئٹر پر جاری پیغام میں شاہد آفریدی نے کہا کہ ‘آئیں وزیراعظم کی کال پر بطور قوم ایک گھنٹہ کشمیر کیلئے نکالیں’۔

شاہد آفریدی نے کہا کہ وہ جمعے کو 12 بجے کشمیریوں سے اظہار یکجہتی کیلئے مزار قائد پہنچیں گے۔ انہوں نے اپنے پرستاروں سے اپیل کی کہ وہ بھی ان کا ساتھ دینے کیلئے مزار قائد پہنچیں۔

شاہدآفریدی نے کہا کہ 6 ستمبر یوم دفاع کو وہ ایک شہید کے گھر جائیں گے جبکہ جلد ہی وہ لائن آف کنٹرول کا دورہ بھی کریں گے۔

پاکستان کے لیجنڈ کرکٹر جاوید میاں داد نے بھی اعلان کیا ہے کہ وہ جلد امن کا پیغام لے کر لائن آف کنٹرول کا دورہ کریں گے۔

جاوید میاں داد نے کہا کہ جو بھی شخص ان کے ساتھ آنا چاہے آسکتا ہے، ہم ایل او سی پر امن کیلئے پرچم لہرائیں گے اور دنیا کو بتائیں گے کہ ہم امن چاہتے ہیں اور کشمیریوں کے ساتھ ہیں۔

یاد رہےبھارت نے 5 اگست کو آئین کے آرٹیکل 370 کو ختم کرکے کشمیر کی خصوصی حیثیت ختم کردی تھی اور سلامتی کونسل کی قراردادوں کے برخلاف کشمیر کو بھارت کا حصہ بنالیا تھا۔

بھارتی اقدام کیخلاف کشمیریوں کی جانب سے بھرپور احتجاج کے خوف سے بھارت نے 4 اگست کو ہی وادی بھر میں سخت کرفیو نافذ کردیا تھا جبکہ اضافی فوجی دستے نافذ کرکے مقبوضہ جموں و کشمیر کو جیل میں تبدیل کردیا ہے۔

کرفیو کے باوجود کشمیری اس بھارتی اقدام کیخلاف موقع ملتے ہیں سڑکوں پر نکل رہے ہیں لیکن قابض افواج انہیں پیلیٹ گنز اور آنسو گیس کی شیلنگ سے نشانہ بنارہے ہیں جس کی وجہ سے اب تک 10 کے قریب افراد شہید اور سیکڑوں زخمی ہوچکے ہیں۔

Comments are closed.