بھارت پرامن مظاہرین کے خلاف وحشیانہ طاقت کا استعمال بند کرے، صدر پاکستان

اسلام آباد( زمینی حقائق ڈاٹ کام )صدر پاکستان ڈاکٹر عارف علوی نے بھارت میں پرامن مسلم مظاہرین کے خلاف وحشیانہ طاقت کے استعمال کی مذمت کی ہے۔

بھارت میں توہین رسالت کے خلاف احتجاج کے دوران بھارتی فورسز کی طرف سے وحشیانہ رویہ پر جاری بیان میں صدر پاکستان عارف علوی نے کہا گزشتہ روز ہندوستان کے کئی شہروں میں پرامن مسلمان مظاہرین پر طاقت کے استعمال کیا گیا۔

عارف علوی نے نہتے مظاہرین پرطاقت کے استعمال کی شدید مذمت کرتے ہوئے کہا کہ وحشیانہ تشدد سے 2 بے گناہ مظاہرین کی شہادت ہوئی اور سینکڑوں پرامن مظاہرین کو بلا جواز گرفتار کیا گیا۔

ڈاکٹر عارف علوی نے نے کہا کہ مختلف ہندوتوا گروہوں کی طرف سے مسلمانوں کے خلاف حیلے بہانوں سے بلا روک ٹوک اور اکثر ریاستی سرپرستی میں تشدد بھارت میں اسلامو فوبیا اور انتہا پسندی کے بڑھتے ہوئے رجحان کا عکاس ہے۔

صدر نے ہندوستان پر زور دیا کہ وہ اپنی ہندوتوا پالیسیوں سے کنارہ کشی اختیار کرے اور اپنی اقلیتوں کو نشانہ بنانا، ان کے مذہبی جذبات کو مجروح کرنا بند کرے اور ہندوستانی اقلیتوں بالخصوص مسلمانوں کے خلاف تشدد اور نفرت پھیلانے کے بڑھتے ہوئے واقعات کو روکے۔

ڈاکٹر عارف علوی نے زور دے کر کہاکہ بھارت پرامن مظاہرین کے خلاف وحشیانہ طاقت کا استعمال بند کرے، صدر پاکستان کا کہنا تھا کہ توہین آمیز بیان دینے اور حضور نبی اکرم صلی اللہ علیہ وآلہ وسلم کی شان میں گستاخی کے ذمہ داروں کے خلاف کارروائی کی جائے۔

انہوں نے مزید کہا کہ ہندوستان کو اپنی اقلیتوں کو انسانی حقوق کی خلاف ورزیوں سے بچانے، ان کی حفاظت، سلامتی اور بہبود کو یقینی بنانے اور انہیں امن کے ساتھ اپنے عقائد پر عمل کرنے کی اجازت دینے کے لیے بھی فوری اقدامات کرنے چاہیے۔

صدر مملکت ڈاکٹر عارف علوی نے عالمی برادری سے بھی مطالبہ کیا کہ وہ ہندوستان میں اسلامو فوبیا کی سنگین طور پر بگڑتی ہوئی صورتحال کا فوری نوٹس لے۔