پاکستان نے عالمی بینک کی مزید ایک شرط پوری کر دی، قرض کی منظوری کے امکانات پیدا ہوگئے

فائل:فوٹو

اسلام آباد: پاکستان نے عالمی بینک سے 450 ملین ڈالر کے قرض کے حصول کے لئے مزید ایک شرط پوری کر دی، جس کے تحت عالمی بینک کی جانب سے قرض کی منظوری کے امکانات پیدا ہوگئے ہیں۔زیر خزانہ اسحاق ڈار عالمی بینک کے صدر کو قرض اجرا کی منظوری کیلئے بورڈ میٹنگ پر آمادہ کریں گے۔

نیشنل ٹیکس کونسل کی جانب سے صوبوں اور وفاق کے درمیان سروسز پر ٹیکس وصولی کی حدود کے تعین کے قواعد کی منظوری دے دی گئی ہے۔

وزارت خزانہ کے مطابق یہ ملک بھر میں ٹیکس وصولی کے نظام کو مربوط کرنے کیلئے ایک اہم سنگ میل ہے جو کہ عالمی بینک سے قرضے کی وصولی میں اہم کردار ادا کرے گا، حکام کے مطابق صوبے کابینہ سے منظوری کے بعد یکم مئی تک اس ضمن میں اپنے فیصلے سے آگاہ کریں گے۔

ذرائع کا کہنا ہے کہ سندھ اگلے مالی سال سے ان قواعد کا نفاذ چاہتا ہے جبکہ وفاق کا اصرار ہے کہ رواں ماہ اپریل سے ہی ان قواعد کا اطلاق کیا جائے، تاکہ عالمی بینک سے قرضے کا حصول ممکن بنایا جاسکے۔

پاکستانی حکام کا کہنا ہے کہ قواعد کی منظوری اور ان پر عملدرا?مد عالمی بینک کی جانب سے 450 ملین ڈالر کے قرض کے حصول میں واحد رکاوٹ تھی، جو کہ دور کر دی گئی ہے۔

ذرائع کا کہنا ہے کہ قواعد کی منظوری کے بعد اب اسحاق ڈار عالمی بینک کے صدر سے اپنی ملاقات میں جو اگلے چند روز میں متوقع ہے، قرضوں کی منظوری کیلئے بورڈ میٹنگ بلانے کا مطالبہ کریں گے، ممکنہ طور پر اسحاق ڈار 6 سو ملین ڈالر کے ایفورڈ ایبل انرجی کے سیکنڈ پروگرام کے قرض کی منظوری کی درخواست بھی کریں گے۔

یاد رہے کہ پاکستان کو 6 بلین ڈالر کے قرض کے حصول کیلئے سخت مشکلات کا سامنا ہے اور ابھی تک سعودی عرب وہ واحد ملک ہے، جس نے زبانی طور پر آئی ایم ایف کو 2 ارب ڈالر کا قرضہ فراہم کرنے کی یقین دہانی کرائی ہے، جبکہ متحدہ عرب امارات کی جانب سے تاحال کوئی ضمانت نہیں دی گئی ہے۔