شوبز انڈسٹری کے سینئر اداکار رشید ناز انتقال کرگئے

پشاور(ویب ڈیسک) جاندار اداکاری سے لوگوں کو اپنا گرویدہ بنانے والے شوبز انڈسٹری کے سینئر اداکار رشید ناز انتقال کرگئے۔

اداکار رشید ناز کے انتقال کی اطلاع ان کی بہو اور اداکارہ مدیحہ رضوی نے اپنے انسٹاگرام اکاؤنٹ کے ذریعے دی، انہوں نے بتایا کہ رشید ناز اب ہم میں نہیں رہے۔

سوشل اکاؤنٹ پرمدیحہ رضوی نے لکھا کہ ’ہمارے پیارے بابا رشید ناز آج صبح اس دنیا سے رخصت ہو گئے، مرحوم کی روح کے ایصال ثواب کے لیے سورہ فاتحہ ضرور پڑھیں۔

اس کے ساتھ ساتھ انہوں نے اپنے شوہر اداکار حسن نعمان کو بھی ٹیگ کیا، رشید ناز کو عصر حاضر کے عظیم اداکار مانا جاتا تھا وہ جو بھی کردار لیں اس میں جان ڈال دیتے تھے.

اداکاررشید ناز 9 ستمبر 1948 کو پشاور میں پیدا ہوئے، انہوں نے بےشمار فلموں اور ڈراموں میں اداکاری کے جوہر دکھائے، انھوں نے اپنے ٹیلی ویژن کیرئیر کا آغاز 1971 میں پشتو ڈرامے سے کیا۔

انہوں نے متعدد پشتو، ہندکو اور اردو زبان کے ڈراموں میں کام کیا، ان کا پہلا اردو ڈرامہ ’ایک تھا گاؤں‘ تھا جو 1973 میں نشر کیا گیا۔

ان کا پہلا مقبول ڈرامہ ’ناموس‘ تھا، رشید ناز نے پاکستان کے پہلے نجی ٹیلی ویژن کے ڈرامے ’دشت‘ میں بھی کام کیا۔رشید ناز نے 1988 میں اپنی پہلی پشتو فلم ’زما جنگ ‘میں کام کیا.