عمران خان نے سری لنکن صدر کومجرموں کو سخت سزا کی یقین دہانی کرائی

فوٹو: فائل اے ایف پی

اسلام آباد( ویب ڈیسک) وزیراعظم عمران خان نے سیالکوٹ میں سری لنکن شہری کی ہجوم کے ہاتھوں ہلاکت پر سری لنکا کے صدر گوٹابایا راجاپاکسے سے رابطہ کیا ہے۔

ٹوئٹر پر جاری بیان کے مطابق وزیراعظم عمران خان نے بتایا کہ انہوں نے سری لنکن صدر گوٹابایا راجا پاکسے سے بات کی اور بتایا کہ سیالکوٹ میں پریانتھا دیاودانا کے قتل پر پاکستانی قوم کو بھی غصہ ہے اور قوم سری لنکا سے شرمندہ ہے۔

وزیراعظم عمران خان کے ٹوئٹر پر جاری بیان میں بتایا گیاہے انہوں نے سری لنکن صدر کو بتایا کہ واقعہ کے بعد سے لے کر اب تک 100 سے زائد ملزم گرفتار ہوچکے ہیں۔

عمران خان نے سری لنکن صدر کومجرموں کو سخت سزا کی یقین دہانی کرائی اور کہاکہ مجرموں کو انصاف کے کٹہرہے میں لا کر قانون کے مطابق سخت ترین سزا دی جائے گی۔

http://

Spoke to Sri Lankan President Gotabaya Rajapaksa today in UAE to convey our nation’s anger & shame to people of Sri Lanka at vigilante killing of Priyantha Diyawadana in Sialkot. I informed him 100+ ppl arrested & assured him they would be prosecuted with full severity of the law

— Imran Khan (@ImranKhanPTI) December 4, 2021

اس سے قبل سیالکوٹ کی فیکٹری میں مشتعل ہجوم کے ہاتھوں سری لنکن شہری کے قتل پر سری لنکا کے وزیراعظم مہندا راجا پکسے کا بیان سامنے آیا ہے۔

سری لنکن وزیراعظم مہندا راجا پکسے نے پریانتھا کی موت کے ردعمل میں جاری بیان میں کہا ہے کہ پاکستان میں انتہا پسند ہجوم کا پریانتھا کمارا پر ظالمانہ تشدد دیکھ کر شدید صدمہ ہوا۔

سری لنکن وزیراعظم کا کہنا ہے کہ میرا دل سیالکوٹ میں ہجوم کے ہاتھوں موت کے منہ میں جانے والے پریانتھا کے اہلخانہ کے لیے بہت دُکھی ہے۔

مہنداراجا پکسے نے وزیراعظم پاکستان سے کہا کہ امید ہے عمران خان ملزمان کو انصاف کے کٹہرے میں لائیں گے، وزیراعظم سری لنکا نے کہا امید ہے وہ عمران خان اپنا وعدہ پورا کریں گے۔

واضح رہے کہ گزشتہ روز سیالکوٹ میں ایک فیکٹری کا سری لنکن منیجر کو اسی فیکٹری کے ملازمین نے تشددکرکے ہلاک کردیاتھا، مشتعل افراد نے لاش کو سڑک پر گھسیٹنے کے بعد آگ لگادی تھی۔

قتل کے مر تکب مشتعل افراد کا دعویٰ ہے کہ مقتول نے مبینہ طور پر مذہبی جذبات مجروح کیے تھے، وزیراعظم عمران خان نے ردعمل میں تمام ذمہ داروں کو انصاف کے کٹہرے میں لانے کا عزم ظاہر کیا تھا۔

ذرائع کے مطابق واقعہ کی تحقیقات کرنے والے پولیس نے انکشاف کیاہے کہ فیکٹری منیجر نے مشتعل افراد سے غلط فہمی کا اظہار کرکے معذرت بھی کی تھی لیکن اس کے باوجود اسے قتل کر دیا گیا۔