وزیراعظم شہبازشریف کی جماعت ن لیگ کو آزاد کشمیر ضمنی انتخاب میں شکست ہوگئی

فوٹو: اسکرین گریب

باغ، آزاد کشمیر: وزیراعظم شہبازشریف کی جماعت ن لیگ کو آزاد کشمیر ضمنی انتخاب میں شکست ہوگئی، پیپلزپارٹی کے پیپلز پارٹی کے سردار ضیاء القمر 22619 ووٹ لے کر کامیاب ہو گئے.

ضمنی الیکشن باغ ایل اے 15 کے انتخابی نتائج کے مطابق مسلم لیگ ن کے مشتاق منہاس 17321 ووٹ لے پیپلزپارٹی کے امیدوار سے ہار گئے.

پاکستان کی طرح آزاد میں اسٹیبلشمنٹ کے ہاتھوں تقسیمِ در تقسیم کا شکار ہونے والی سابق حکمران جماعت تحریک انصاف کے کرنل ضمیر 4630 ووٹ حاصل کر سکے۔

پیپلزپارٹی کے سردار ضیاءالقمر 5298 کی لیڈ سے سے باغ آزادکشمیر کے ضمنی انتخاب میں فتح یاب ہوئے.

آزاد جموں کشمیر قانون ساز اسمبلی کے حلقہ ایل اے پندرہ باغ ٹو (وسطی باغ) میں ضمنی انتخاب کے لئے آج پولنگ ہوئی ۔ مسلم لیگ نون پیپلز پارٹی اور پی ٹی آئی کے مابین کانٹے کے مقابلہ کی توقع تھی۔

 ضمنی انتخاب کے لئے پولنگ وقفے بغیر صبح آٹھ بجے شام پانچ بجے تک جاری رہی، ضمنی انتخاب سابق وزیر اعظم سردار تنویر الیاس کی عدالتی فیصلے میں نااہلی کے نتیجہ میں خالی ہوئی نشست پر ہوا، اس حلقہ میں اٹھار ہ امیدوار ضمنی انتخاب میں حصہ لے رہے تھے۔ مسلم لیگ نون پیپلز پارٹی اور پی ٹی آئی کے مابین مقابلہ تھا۔

 پاکستان تحریک انصاف کی کرنل ضمیر ، پاکستان پیپلز پارٹی ضیا القمر، اور مسلم لیگ نون کے مشتاق منہاس کے مابین سخت مقابلہ متوقع تھا۔بلاول بھٹو اور مریم نواز کی انتخابی مہم میں شمولیت کے بعد انتخاب اہمیت اختیار کر گیا تھا۔

 حلقہ ایل اے پندرہ باغ ٹو میں کل ووٹوں کی تعدا د ایک لاکھ ایک ہزار ایکسو پینتالیس ، مرد ووٹوں کی تعداد ترپن ہزار ایک سو سات ، جبکہ خواتین کے اڑتالیس ہزار اڑتیس ووٹ درج ہیں ۔

گزشتہ انتخاب میں اس حلقے میں پیپلز پارٹی کے امیدوار سردار ضیاء القمر چودہ ہزار سات سو اکیاسی ووٹ لیکر دوسرے نمبر پر جبکہ مسلم لیگ نون کے مشتاق منہاس گیار ہزار دو سو پندرہ ووٹ لیکر تیسرے نمبر پر رہے تھے۔

 اس حلقے سے سردار تنویر الیاس بیس ہزار دس ووٹ لیکر کامیاب ہوئے تھے اور آزاد کشمیر کے وزیر منتخب ہوئے تھے گزشتہ انتخابات میں کل انسٹھ ہزار ایک سو سولہ ووٹ پول ہوئے اس حلقے مین ایک سو اننانوے پولنگ سٹیشن قائم کئے گئے ہیں ۔

مردوں کے لئے انسٹھ پولنگ اسٹشن ، خواتین کے لئے ستاون پولنگ اسٹیشن ، خواتین اور مردوں کے تہتر جائینٹ پولنگ اسٹیشن قائم کئے گئے ہیں۔

 اس حلقے کے تمام پولنگ اسٹیشن پر کل دو سو چوراسی پولنگ بوتھ قائم کئے گئے ہیں چورانوے سنگل پولنگ بوتھ جبکہ ایک سو نوے ڈبل بوتھ قائم کئے گئے ہیں ایل اے پندرہ باغ ٹو آزاد کشمیر پولیس کے تین ہزار جبکہ فرنٹیئر کانسٹیبلری کے پانچ سو پچاس اہلکار سیکورٹی کے لئے تعینات کئے گئے۔