مسلم لیگ ن اور ق کا اتفاق رائے، نکاح فارم میں ختم نبوت کا حلف لازمی قرار

فائل:فوٹو

لاہور: پنجاب میں مسلم لیگ ن اور ق کا اتفاق رائے، نکاح فارم میں ختم نبوت کا حلف لازمی قرار دے دیا گیا، حکومت پنجاب نے متفقہ قانون سازی کر لی ۔ قرارداد پاکستان مسلم لیگ (ن) اور مسلم لیگ (ق) کے اراکین صوبائی اسمبلی نے مشترکہ طور پر قرارداد پیش کی تھی۔

صوبائی حکومت نے مذکورہ فیصلے کا اعلان اپنے آفیشل ٹوئٹر ہینڈل پر ایک مختصر ویڈیو کلپ میں کیا۔ گزشتہ سال اکتوبر میں پنجاب اسمبلی نے متفقہ طور پر ایک قرارداد منظور کی تھی جس میں نکاح نامہ کے فارم میں ختم نبوت کے حلف کو شامل کرنے کا مطالبہ کیا گیا تھا تاکہ مسلمانوں اور غیر مسلموں (احمدیوں) کے مابین شادی کی حوصلہ شکنی کی جا سکے۔

قرارداد پاکستان مسلم لیگ (ن) اور مسلم لیگ (ق) کے اراکین صوبائی اسمبلی نے مشترکہ طور پر پیش کی تھی۔

پنجاب حکومت کے حکم پر نکاح نامہ میں ختم نبوت ﷺ کا حلف نامہ لازم قرار دے دیا گیا: pic.twitter.com/34kOgTjMuA

— Government of Punjab (@GovtofPunjabPK) October 14, 2022

مسلم لیگ (ق) کی ایم پی اے خدیجہ عمر نے کہا کہ بہت سی شکایات تھیں کہ لوگ شادی کے وقت اپنا عقیدہ چھپاتے ہیں، شادی کے کئی سال گزرنے کے بعد گھر والوں کو معلوم ہوتا ہے کہ میاں بیوی میں سے ایک احمدی عقیدہ کی پیروی کر رہا ہے جس کی وجہ سے گھر والوں اور بچوں کے لیے بہت پریشانیاں ہوتی ہیں۔

انہوں نے کہا کہ پنجاب اسمبلی کے اسپیکر کے دفتر کو بھی اس حوالے سے متعدد شکایات موصول ہوئی تھیں جس کے بعد نکاح نامہ کے فارم میں عقیدہ ختم نبوت ﷺکا خانہ شامل کرنا ضروری سمجھا گیا۔

انہوں نے ایک سوال کے جواب میں اس بات پر زور دیا کہ یہ متعدد شکایات کے بارے میں نہیں بلکہ مسلم عقیدے کی بنیادی ضرورت ہے۔