مساجدمیں عبادت صرف ویکسین لگانے والے کر سکیں گے ، سندھ حکومت

فوٹو: فائل

کراچی( زمینی حقائق ڈاٹ کام) مساجدمیں عبادت صرف ویکسین لگانے والے کر سکیں گے ، سندھ حکومت کی طرف سے نیا ایس او پی جاری کردیاگیاہے۔

سندھ کے محکمہ داخلہ کی طرف سے جمعہ کو مساجد میں عبادت سے متعلق نیشنل کمانڈ اینڈ آپریشن سینٹر (این سی او سی) کی ہدایات کی روشنی میں نئے احکامات جاری کئے گئے ہیں۔

محکمہ داخلہ سندھ کے نوٹیفکیشن میں کہا گیا ہے کہ مساجد میں صرف ویکسین شدہ افراد کو ہی عبادت کی اجازت ہوگی جب کہ ماسک کی پابندی بھی برقرار رکھی گئی ہے۔

نوٹیفکیشن کے ذریعے عائد کی گئی پابندیوں میں بتایا گیاہے کہ مساجد کے اندر نماز پڑھنے والوں کے لیے ماسک پہننا لازمی ہوگا جبکہ مساجد کے فرش سے قالین بھی ہٹا لی جائیں۔

محکمہ داخلہ سندھ نے یہ ہدایت بھی جاری کی ہے کہ مساجد کو عبادت کے لیے ہوا دار کرنے کے انتظامات بھی کیے جائیں ،صوبائی حکومت جاری کردہ ایس او پی پر عمل درآمد ممکن بنائے گی۔

واضح رہے سندھ حکومت نے جمعہ کو مساجد میں نماز ادا کرنے والے افراد کے لیے کورونا وائرس کی ویکسینیشن لازمی قرار دے دی، تاکہ وائرس کے پھیلاؤ کو روکا جا سکے۔

جمعہ کو جاری کردہ ایک نوٹیفکیشن میں، محکمہ داخلہ سندھ نے نیشنل کمانڈ اینڈ آپریشن سینٹر( (NCOC) کی ہدایات کے مطابق مساجد کے لیے اپ ڈیٹ کردہ COVID-19 پروٹوکولز کی فہرست جاری کی۔

مساجد کی انتظامیہ کو ہدایت کی گئی ہے کہ وہ مساجد کے فرشوں سے قالین ہٹائیں اور گھر کے اندر نماز کے اجتماعات کے لیے مناسب وینٹیلیشن کو یقینی بنائیں۔

خیال رہے کہ 25 نومبر تک سندھ میں 6 ہزار 468 ٹیسٹ کیے جانے کے بعد صوبے میں کورونا وائرس کے 43 نئے کیسز رپورٹ ہوئے۔ کسی ہلاکت کی اطلاع نہیں ملی۔

وزیر اعلیٰ سندھ مراد علی شاہ کی طرف سے جاری بیان میں کہا گیا ہے کہ صوبے میں 6,686,895 ٹیسٹ کیے گئے جن میں سے 473,750 کیسز کی تشخیص ہوئی جن میں سے 97.1% یعنی 460,136 مریض صحت یاب ہو چکے ہیں۔

انہوں نے مزید کہا کہ 5,995 مریض زیر علاج ہیں جن میں سے 5,794 گھروں میں تنہائی میں ہیں، جب کہ 12 کو آئسولیشن مراکز اور 189 کو مختلف اسپتالوں میں داخل کیا گیا ہے۔