اسلام آباد( زمینی حقائق ڈاٹ کام)وزیراعظم عمران خان نے کہا ہے کہ مسلسل حکومتی کوششوں سے ملک کا مشکل دور گزر ختم ہونے والا ہے اور اب ترقی، معیشت بڑھانے اور نوکریاں دینے کا وقت آگیا ہے۔
وزیراعظم عمران خان نے لودھراں تا ملتان شاہراہ منصوبے کی تقریب سے خطاب کرتے ہوئے کہا کہ جیسے ہی ہم حکومت میں آئے توکہا گیا کہاں ہے نیا پاکستان؟ لیکن ہم نے ڈھائی سال صبر سے گزارا، میڈیا نے بھی تاثر دیا کہ بٹن آن کرکے نیا پاکستان بن جائیگا ۔
عمران خان کا کہنا تھا کہ 1947 کے بعد ملک کا نظام بدلنے اور مافیا سے خود کو آزاد کرانے کے لیے بہت بڑی جدوجہد چل رہی ہے، ہر جگہ مافیا ہے جو چاہتی ہے حکومت ناکام ہو تاکہ وہ فائدہ اٹھا سکے، اس وقت پاکستان کی سب سے اہم جدوجہد ہے اور یہ قانون کی حکمرانی کی جدوجہد ہے۔
انہوں نے کہا کہ اسی جدو جہد سے معاشرہ بدلتا ہے جب طاقتور قانون کے نیچے آتا ہے، اس سے خوشحالی آتی ہے، دنیا میں کوئی بھی ملک دیکھ لیں، وہاں کوئی قبضہ مافیا، چینی مافیا یا سیاسی مافیا نہیں ہے لیکن ہمارے ہاں بد قسمتی ایسا ہے۔
ان کا کہنا تھا جب کہ اپوزیشن نے بھی این آر او کے لیے ڈرامہ کیا اور تنقید کی، یہ میرے، ٹیم کے لیے اور عوام کے لیے سبق ہے کہ معاشرے میں تبدیلی جدوجہد سے آتی ہے۔
وزیراعظم نے اپوزیشن والے کہتے ہیں این آر او دو ورنہ حکومت گرادیں گے، خود کو جمہوری کہنے والے فوج کو کہہ رہے ہیں حکومت گرادو، ان کا مقصد اپنے مفادات کا تحفظ کرنا ہے اور یہ اس کی خاطر حکومت گرانے کے لیے کچھ بھی کرنے کو تیار ہیں ۔
وزیر اعظم عمران خان کا لودھراں تا ملتان شاہراہ کی اپ گریڈیشن و بحالی منصوبے کے سنگ بنیاد کی تقریب سے خطاب۔@PakPMO @MuradSaeedPTI https://t.co/Mm4AzjZK76
— Government of Pakistan (@GovtofPakistan) June 4, 2021
عمران خان نے کہا اپوزیشن کے چند لوگ اس لئے ایسا کررہے ہیں کہ ان کے باہر اربوں ڈالر پڑے ہیں، انہیں ڈر ہے یہ پیسے واپس آجائیں گے، ان کی چوریاں سامنے آرہی ہیں اس لیے ان کی کوشش ہے حکومت کو کسی نہ کسی طرح گرادو۔
وزیراعظم عمران خان نے کہا ہے کورونا میں حکومتوں کے اقدامات کی وجہ سے پاکستان میں گروتھ ریٹ4 فیصد اور بھارت میں منفی 7فیصد پر چلا گیا،ہم آئی ایم ایف کی وجہ سے بھی پریشر میں تھے اور بیروزگاری تھی لیکن آنے والے دنوں میں قوم کو مزید خوشخبریاں دوں گا۔
وزیراعظم نے کہا بھارت میں دیکھیں آج کیا حالات ہیں، بھارت کی حکومت نے جو فیصلے کیے ان کا کیا حال ہوگیا، اس وقت ان کا مائنس 7 گروتھ ریٹ ہے اور ہمارا 4 فیصد پر چلا گیا ہے، جب کورونا آیا تو بھارت کے مقابلے میں پاکستان کے حالات بہت برے تھے۔
انہوں نے مزید کہا کہ ہماری حکومت کا پہلا سال استحکام میں گزرا اور دوسرے سال کورونا آیا، اس سے لوگوں اور معیشت کو بچانے کی کوشش کی، آج ہم جہاں کھڑے ہیں میرا ایمان ہے کہ سب سے مشکل وقت سے نکل گیاہے۔
وزیراعظم نے کہا اب جو وقت آرہا ہے یہ ملک کی ترقی کا سفر ہے، ہم سب کچھ آنے والی نسلوں کے لیے کررہے ہیں جو کسی نے نہیں کیا، سب نے الیکشن کو سامنے رکھ کر کام کیے، اب جو بر اوقت تھا وہ نکل گیا، اب ترقی، معیشت بڑھانے، دولت میں اضافہ اور نوجوانوں کو نوکریاں دینے کا وقت ہے۔
