فوٹو: فائل
اسلام آباد(زمینی حقائق ڈاٹ کام)چیئرمین نیب جاوید اقبال نے کہا ہے ریاست مدینہ کے خواب کی تعبیر ناممکن نہیں ہے۔
ایک تقریب سے خطاب میں چیئرمین نیب نے کہا، ریاست مدینہ کی تکمیل کے لیے صرف اپنے مفادات کو قومی مفادات کے پس پشت رکھنا ہوگا، وہ وقت دور نہیں جب پاکستان بھی ترقی یافتہ ملکوں میں شامل ہوگا۔
جاوید اقبال کہنا تھا کہ کرپشن نے ملک کو معاشی تباہی کے دہانے پر لاکھڑا کیا ہے، نیب کرپشن کے خلاف بلا امتیاز کارروئیاں جاری رکھے ہوئے ہے، ہم کرپشن کے خاتمے میں دیانت داری سے اپنا کام کر رہے ہیں۔
جسٹس ریٹائرڈ جاوید اقبال نے کہا کہ معاشرے میں تعمیری کردار کو فروغ دینا ہے جس کے لیے نیب تن تنہا کرپشن کے خلاف کام نہیں کر سکتا، سب کو ساتھ مل کر کام کرنا ہو گا۔
چیئرمین نیب کا کہنا تھا کہ نیب ملک میں کرپشن کے خاتمے کا اہم ادارہ ہے اور کرپشن کے خاتمے کے خلاف پہلی اینٹ رکھ دی ہے، ملک کو کرپشن فری بنانے میں نئی نسل کو بھی ساتھ دینا ہو گا۔
انہوں نے کہا کرپشن کا خاتمہ نیب کی پہلی اور آخری جستجو ہے اور اگر احتساب کرنا جرم ہے تو یہ جرم ہم کرتے رہیں گے، لوگ ریاست مدینہ کا خواب دیکھ رہے ہیں جس کی تعبیر نا ممکنات میں سے نہیں ہے۔
ان کا کہنا تھا کہ پاکستان میں ڈھیروں قوانین موجود ہیں، صرف ان کے نفاذ کی ضرورت ہے، یہی وجہ ہے کہ نیب سے سفارش کلچر کا خاتمہ کر کے میرٹ کو اوپر لائے ہیں۔
چیئرمین نیب نے کہا ملک 100 ارب ڈالرز سے زائد کا مقروض ہو چکا ہے جب کہ نیب اپنے قیام سے اب تک 328 ارب روپے کی وصولی کر چکا ہے، ہم بھی دنیا کے ترقی یافتہ ممالک میں شامل ہونا چاہتے ہیں اس لیے اپنا فرض ادا کر رہے ہیں۔
