ارشد شریف قتل پر اس مرحلے پر کمیشن بنانے کا فائدہ نہیں،اسلام آباد ہائیکورٹ

فائل:فوٹو

اسلام آباد ہائیکورٹ نے کہا ہے کہ ریاست کے ادارے بہتر طور پر اس معاملے کو حل کرسکتے ہیں ارشد شریف قتل پر اس مرحلے پر کمیشن بنانے کا فائدہ نہیں۔

ہائیکورٹ میں ارشد شریف قتل پر جوڈیشل کمیشن کی تشکیل کی درخواست کی سماعت ہوئی۔ وزارت خارجہ و داخلہ کے نمائندے پیش ہوئے اور معاملے کی رپورٹ جمع کرائی۔

وکیل بیرسٹر شعیب رزاق نے استدعا کی کہ ارشد شریف کی ڈیڈ باڈی بھی آج پہنچ جائے گی، ہماری استدعا ہے کہ قتل کی تحقیقات کے لیے جوڈیشل کمیشن بنایا جائے، پاکستانی حکومت نے دبئی حکومت سے ارشد شریف کی ڈی پورٹ کرنے کا کہا تھا، ارشد شریف یہاں سے گئے تو 13 مقدمات ان کے خلاف درج تھے۔

ڈپٹی اٹارنی جنرل نے کہا کہ کینیا کی حکومت کی جانب سے رپورٹ آ جائے، اگر انہیں اس پر کوئی اعتراض ہوا تو اس کیس کو مزید سن لیا جائے۔

چیف جسٹس اطہر من اللہ نے ریمارکس دئیے کہ ریاست کے ادارے بہتر طور پر اس معاملے کو حل کرسکتے ہیں، اس ملک میں صحافیوں کو اٹھایا جاتا رہا ہے، اس مرحلے پر کمیشن بنانے کا کوئی فائدہ نہیں ہوگا۔

بعدازاں عدالت نے کیس کی سماعت ایک ہفتے کے لیے ملتوی کردی۔