غیرشرعی نکاح کیس،چیئرمین پی ٹی آئی، بشریٰ بی بی کیخلاف عدالتی دائرہ اختیار سے متعلق درخواست پر دلائل طلب

فائل:فوٹو

اسلام آباد :سول جج اسلام آباد نے چیئرمین پی ٹی آئی، بشریٰ بی بی کیخلاف مبینہ غیرشرعی نکاح کیس میں عدالتی دائرہ اختیار سے متعلق درخواست پر آئندہ سماعت پر فریقین سے دلائل طلب کرلیے۔ عدالت نے کہا کہ دونوں فریقین کے ایک ہی دن دلائل سنیں گے۔ اس سے قبل تحریری دلائل جمع کروادیں۔

سول جج قدرت اللہ نے مبینہ غیر شرعی نکاح کیس کی سماعت کی۔ مقدمے کے پراسیکوٹر رضوان عباسی نے درخواست دائر کرتے ہوئے کہا کہ دائرہ اختیار کی درخواست پردلائل کے لیے تیاری کرنی ہے، وقت درکار ہے اس لیے سماعت بغیر کارروائی ملتوی کی جائے۔

انہوں نے کہا کہ پی ٹی آئی وکلاء دائرہ اختیار کی درخواست پر دلائل دینے کے بعد پراسیکیوشن دلائل دیگی۔ بشری بی بی کے وکیل نعیم پنجھوتہ نے کہا کہ بشری بی بی کی مستقبل حاضری سے استثنیٰ کی درخواست منظور کررکھی ہے جس پر عدالت نے کہا کہ فردجرم کا معاملہ آیا تو بشریٰ بی بی کی حاضری ضروری ہوگی۔

وکیل کاکہنا تھا کہ وکیل شیرافضل مروت دائرہ اختیار کی درخواست پر دلائل دیں گے۔سول جج قدرت اللہ نے کہا کہ دونوں فریقین کے دلائل ایک ہی تاریخ پر ساتھ ساتھ سن لیں گے آپ اپنے دلائل سے قبل مختلف عدالتوں کے فیصلے بھی جمع کروا دیں۔

وکیل نے کہا کہ گزارش اتنی ہے کہ آئندہ سماعت کی تاریخ چھوٹی دیدیں، جس پر عدالت نے وکیل شیرافضل مروت، پراسیکیوٹر رضوان عباسی کو آئندہ سماعت پر دلایل دینے کی ہدایت کرتے ہوئے سماعت 25 ستمبر تک ملتوی کردی۔