عمران خان نے آرمی ایکٹ وآفیشل سیکریٹ ایکٹ ترامیم سپریم کورٹ میں چیلنج کردیں

فوٹو: فائل

اسلام آباد:چیئرمین پی ٹی آئی عمران خان نے آرمی ایکٹ وآفیشل سیکریٹ ایکٹ ترامیم سپریم کورٹ میں چیلنج کردیں، یہ آئینی درخواست ایڈووکیٹ شعیب شاہین کے زریعے دائر کی گئی ہے۔

سپریم کورٹ میں آئینی درخواست 184/3کے تحت دائر کی گئی اور یہ آئینی درخواست ایڈووکیٹ شعیب شاہین نے دائر کی ہے جس میں وفاق، صدر، وزرات داخلہ اور سیکرٹری قومی اسمبلی کو فریق بنایا گیا ہے۔

درخواست میں مؤقف اختیار کیا گیا ہے کہ آفیشل سیکریٹ ایکٹ اور آرمی ترمیمی ایکٹ بنیادی انسانی حقوق سے متصادم ہیں، آفیشل سیکریٹ ایکٹ کے تحت خفیہ اداروں کو بغیر وارنٹ کسی بھی گھر میں گھس کر تلاشی لینے کا اختیار دینا غیر آئینی ہے۔

عمران خان کی درخواست میں کہا گیا کہ صدر مملکت سوشل میڈیا پر وضاحت کر چکے ہیں اور انہوں نے دونوں قوانین کی منظوری نہیں دی۔

سپریم کورٹ سے استدعا کی گئی ہے کہ آفیشل سیکریٹ (ترمیمی) ایکٹ 2023 آئین کے آرٹیکل 8 سے متصادم ہے جس کے مطابق کوئی بھی قانون جوبنیادی حقوق سے مطابقت نہیں رکھتا یا اس کی تنسیخ کرتا ہے اسے کالعدم قرار دیا جائے گا۔

واضح رہےکہ آفیشل سیکریٹ ایکٹ اور آرمی ایکٹ میں ترامیم کے حوالے سے صدر مملکت ڈاکٹر عارف علوی نے ٹویٹ میں کہا تھا کہ انھوں نے ان بلز پر دستخط نہیں کئے ہیں۔

صدر عارف علوی نے اپنے بیان میں کہا تھا کہ میں آفیشل سیکریٹ ایکٹ اور آرمی ایکٹ ترمیمی بل سے اتفاق نہیں کرتا، میں نے اپنے عملے کو کہا کہ بل کو بغیر دستخط کے واپس بھیجیں۔

صدر پاکستان نے کہا میں نے عملے سے کافی بار تصدیق کی کہ بلز بغیر دستخط کے واپس بھیج دیے گئے ہیں، مجھے آج معلوم ہوا کہ میرے عملے نے میری مرضی اور حکم کو مجروح کیا بعد میں صدر نے اس معاملے پر اپنے سیکرٹری کی خدمات بھی واپس کیں۔