عمران خان کے خلاف غیر شرعی نکاح کیس کا فیصلہ محفوظ، آج ہی سنایا جائے گا

فائل:فوٹو

اسلام آباد:ڈسٹرکٹ اینڈ سیشن کورٹ اسلام آباد نے چیئرمین تحریک انصاف عمران خان کے خلاف غیر شرعی نکاح کیس کا فیصلہ محفوظ، آج ہی سنایا جائے گا۔

سول جج قدرت اللّٰہ کی عدالت میں محمد حنیف کی جانب سے دائر کی گئی درخواست پر سماعت ہوئی۔

چیئرمین پی ٹی آئی عمران خان کے خلاف غیر شرعی نکاح کیس قابلِ سماعت ہو گا یا نہیں؟ عدالت کی جانب سے فیصلہ کچھ دیر بعد سنایا جائے گا۔

درخواست گزار کے وکیل رضوان عباسی نے دائر درخواست پر دلائل دیتے ہوئے کہا کہ چیئرمین پی ٹی آئی سے نکاح کے وقت بشریٰ بی بی کی عدت مکمل نہیں ہوئی تھی، چیئرمین پی ٹی آئی کا نکاح لاہور میں ہوا لیکن دونوں بنی گالہ میں رہ رہے تھے، چیئرمین پی ٹی آئی اور بشریٰ بی بی نے پہلے نکاح کے بعد کافی وقت بنی گالہ میں گزارا۔

درخواست گزار کے وکیل رضوان عباسی نے دورانِ دلائل مختلف عدالتوں کے فیصلوں کا حوالہ بھی دیا۔

سول جج قدرت اللّٰہ نے دلائل سننے کے بعد فیصلہ محفوظ کر لیا جو آج ہی کچھ دیر بعد سنایا جائے گا۔