فائل:فوٹو
اسلام آباد:اسلام آباد ہائی کورٹ نے صوابی میں درج اینٹی کرپشن کے مقدمے میں سابق اسپیکر قومی اسمبلی اسد قیصر کی حفاظتی ضمانت منظور کرتے ہوئے دس روز میں متعلقہ عدالت سے رجوع کرنے کی ہدایت کردی۔
اسلام آباد ہائیکورٹ کے جسٹس طارق محمود جہانگیری نے کیس کی سماعت کی۔ سابق اسپیکر قومی اسمبلی عدالت میں پیش ہوئے۔ عدالت نے پچاس ہزار روپے کے ضمانتی مچلکوں کے عوض اسد قیصر کی دس روز کی حفاظتی ضمانت منظور کرلی۔
عدالت نے اسد قیصر کو متعلقہ عدالت میں پیش ہونے کا حکم دیتے ہوئے ریمارکس دیے کہ انور تاج کیس والا ہی آرڈر کر رہے ہیں ، وکیل سے مکالمہ کرتے ہوئے عدالت نے کہا کہ جمعے کو آپ نہیں تھے تو درخواست گزار کو تو آنا چاہیے تھا ۔
وکیل شیر افضل مروت نے کہا کہ معاون وکیل آیا ہوا تھا لیکن وہ بہتر طریقے سے عدالت کو آگاہ نہیں کرسکا تھا۔ عدالت نے جمعے کو عدم پیروی پر اسد قیصر کی ضمانت خارج کر دی تھی۔
بعدازاں عدالت نے اسد قیصر کی دس روزہ حفاظتی ضمانت منظور کرتے ہوئے درخواست نمٹا دی۔
Comments are closed.