متحدہ عرب امارات نےبھارت کے ساتھ دفاعی معاہدہ کیلئے لیٹر آف انٹینٹ سائن کرلیا

فوٹو : سوشل میڈیا

اسلام آباد : متحدہ عرب امارات نےبھارت کے ساتھ دفاعی معاہدہ کیلئے لیٹر آف انٹینٹ سائن کرلیا،اس بات کی تصدیق بھارت کے سیکرٹری خارجہ وکرم مصری نے یواےای کے صدر شیخ محمد بن زاید النہیان کے بھارت کےدورہ کے موقع پر کی ہے.

اس حوالے سے  روزنامہ جنگ کی رپورٹ میں بتایا گیا ہے کہ بھارت اور متحدہ عرب امارات کے درمیان دفاعی معاہدے کیلئے پیش رفت ہوئی ہے ، دونوں ممالک کے درمیان ایل این جی کی فروخت کیلئے 3ارب ڈالر کے معاہدے پر دستخط بھی ہوگئے ہیں.

متحدہ عرب امارات کے صدر شیخ محمد بن زاید النہیان نے بھارت کے دورے کے دوران بھارتی وزیر اعظم نریندر مودی سے ملاقات کی، دونوں رہنمائوں نے تجارت کو 200ارب ڈالر تک لے جانے کے عزم کا اظہار کیا.

بھارت کے سیکرٹری خارجہ وکرم مصری نے صحافیوں کو بتایا کہ فریقین نے اسٹریٹجک دفاعی شراکت داری کی تشکیل کی جانب پیش رفت کےلئے ایک لیٹر آف انٹینٹ (اظہارِ دلچسپی کی دستاویز) پر دستخط کئے ہیں۔

بھارت نے گزشتہ روز (پیر) متحدہ عرب امارات سے مائع قدرتی گیس (ایل این جی) خریدنے کے لئے 3 بلین ڈالر کے معاہدے پر دستخط کیے ہیں، جس کے بعد وہ متحدہ عرب امارات کا سب سے بڑا صارف بن گیا ہے۔

یہ پیش رفت دونوں ممالک کے رہنماؤں کے درمیان تجارت اور دفاعی تعلقات کو مضبوط بنانے کے لیے ہونے والی بات چیت کے دوران سامنے آئی۔

اس معاہدے پر متحدہ عرب امارات کے صدر شیخ محمد بن زاید النہیان کے بھارت کے انتہائی مختصر دو گھنٹے کے دورے کے دوران دستخط کیے گئے، جہاں انہوں نے بھارتی وزیر اعظم نریندر مودی سے ملاقات کی۔

واضح رہے یمن کے معاملے پر یو اے ای اور سعودی عرب کے درمیان کشیدگی اور سعودی کے پاکستان کے ساتھ دفاعی معاہدے کے بعد متحدہ عرب امارات کی بھارت کے ساتھ معاہدہ کرنے میں دلچسپی پاک یو اے ای تعلقات کے تناظر میں حکومت پاکستان کے دعووں کے برعکس ہے.