رواں سال 85 لاکھ پاکستانی سےبیرون ملک گئے،51 ہزارآف لوڈ کئے گے

فوٹو : فائل

اسلام آباد : رواں سال 85 لاکھ پاکستانی سےبیرون ملک گئے،51 ہزارآف لوڈ کئے گے، ڈی جی ایف آئی اے کی قائمہ کمیٹی کو بریفنگ،قومی اسمبلی کی قائمہ کمیٹی برائے اوورسیز پاکستانیز و انسانی حقوق کا اجلاس چیئرمین کمیٹی آغا رفیع اللہ کی صدارت میں منعقد ہوا، جس میں بیرونِ ملک سفر کے دوران آف لوڈنگ، غیر قانونی ہجرت، بھیک مانگنے کے واقعات اور امیگریشن اصلاحات پر تفصیلی بریفنگ دی گئی۔

ڈی جی ایف آئی اے نے بتایا کہ کمیٹی کو آگاہ کیا کہ رواں سال مجموعی طور پر51 ہزار افراد کو مختلف وجوہات کی بنیاد پر آف لوڈ کیا گیا۔ ان کے مطابق 24ہزار پاکستانی سعودی عرب میں بھیک مانگنے پر ڈی پورٹ ہوئے، جبکہ دبئی نے 6 ہزار اور آذربائیجان نے ڈھائی ہزار پاکستانیوں کو اسی وجہ سے واپس بھیجا۔

 ڈی جی ایف آئی اے کا کہنا تھا کہ لوگ عمرہ ویزے کے نام پر سعودی عرب جا کر یورپ جانے کی کوشش کرتے ہیں، ایسے افراد کو شواہد کی بنیاد پر آف لوڈ کیا گیا، حتیٰ کہ بعض کے پاس یورپ جانے کے دستاویزی ثبوت بھی موجود تھے۔

کمیٹی کو بتایا گیا کہ اس سال کمبوڈیا جانے والے 24 ہزار افراد میں سے 12 ہزار تاحال واپس نہیں آئے، جبکہ برما (میانمار) میں سیاحتی ویزے پر جانے والے چار ہزار افراد میں سے ڈھائی ہزار واپس نہیں لوٹے۔ ڈی جی ایف آئی اے کے مطابق آف لوڈنگ اور مؤثر پالیسیوں کے باعث پاکستانی پاسپورٹ کی رینکنگ 118 سے بہتر ہو کر 92 پر آگئی ہے۔

 گزشتہ برسوں میں غیر قانونی ہجرت کرنے والے ممالک میں پاکستان ٹاپ فائیو میں شامل تھا، تاہم اب پاکستان اس فہرست سے نکل چکا ہے۔ڈی جی ایف آئی اے نے بتایا کہ گزشتہ سال 8 ہزار افراد غیر قانونی طور پر یورپ گئے تھے، جبکہ اس سال یہ تعداد چار ہزار تک رہنے کی توقع ہے۔ مجموعی طور پر 56 ہزار پاکستانی بھیک مانگنے کے باعث سعودی عرب سے ڈی پورٹ ہوئے۔ انہوں نے مزید بتایا کہ دبئی اور جرمنی نے پاکستانی سرکاری پاسپورٹ پر ویزہ فری سہولت دی ہے۔

امیگریشن اصلاحات کے حوالے سے بتایا گیا کہ ایمی (EMI) ایپلیکیشن جنوری کے وسط میں لانچ کی جائے گی، جس کے ذریعے بیرونِ ملک جانے والے افراد روانگی سے 24 گھنٹے قبل امیگریشن کلیئرنس حاصل کر سکیں گے۔ ڈی جی ایف آئی اے نے یہ بھی انکشاف کیا کہ زمبابوے میں پاکستانی سفیر کے مطابق ایتھوپیا اور زمبیا کے راستے غیر قانونی طور پر یورپ جانے کے واقعات سامنے آئے ہیں۔

جعلی فٹ بال کلب نے ٹیم کو جاپان بھیجا، جس میں ایک معذور شخص بھی شامل تھا

قائمہ کمیٹی کےجلاس میں عملے کی کمی کا ذکر کرتے ہوئے بتایا گیا کہ اسلام آباد ایئرپورٹ پر ایف آئی اے کاؤنٹرز پر عملہ کم ہے، اس کمی کو پورا کرنے کے لیے اسلام آباد پولیس کی 30 لیڈی اہلکاروں کی خدمات لی جا رہی ہیں۔ ایک دلچسپ مگر تشویشناک واقعہ میں بتایا گیا کہ ایک جعلی فٹ بال کلب نے ٹیم کو جاپان بھیجا، جس میں ایک معذور شخص بھی شامل تھا؛ تحقیقات سے معلوم ہوا کہ یہی جعلی کلب 2022 میں بھی ٹیم جاپان بھیج چکا تھا۔

مزید بریفنگ میں بتایا گیا کہ رواں سال 85 لاکھ افراد بیرونِ ملک گئے، جبکہ 226 افراد کے خلاف مقدمات درج کیے گئے۔ گزشتہ تین ماہ میں 450 افراد ایرانی سرحد سے غیر قانونی طور پر جاتے ہوئے پکڑے گئے۔ اس کے علاوہ بنگلہ دیشی شہریوں کے پاکستان کے سیاحتی ویزے پر یورپ جانے کے انکشافات بھی سامنے آئے۔ جعلی دستاویزات پر گزشتہ سال 287 اور اس سال 170 افراد کو ڈی پورٹ کیا گیا۔

سیکرٹری اوورسیز پاکستانیز نے کمیٹی کو بتایا کہ حکومت نے 10 کمیونٹی ویلفیئر اتاشی پوسٹیں قائم کرنے کا فیصلہ کیا ہے، جو سعودی عرب، جرمنی، فرانس، چین، آسٹریلیا، ناروے، کینیڈا اور برطانیہ میں تعینات ہوں گی۔ ان پوسٹس کا مقصد پاکستانی ورک فورس کی فلاح اور بیرونِ ملک روزگار کے مواقع میں اضافہ ہے۔

انہوں نے بتایا کہ سعودی عرب کے ویژن 2030 کے تحت 1 ٹریلین ڈالر سے زائد کے میگا پراجیکٹس جاری ہیں، جن میں نیوم سٹی، جدہ سینٹرل، ریڈ سی گلوبل، کنگ سلمان انرجی پارک، جدہ ٹاور، ریاض ایکسپو 2030 اور فیفا ورلڈ کپ 2034 شامل ہیں۔ کنگ عبدالعزیز انٹرنیشنل ایئرپورٹ اور ریڈ سی حب کی توسیع میں بھی روزگار کے مواقع موجود ہیں۔ تاہم بیرونِ ملک صرف ہنرمند افراد ہی نوکری کے اہل ہوں گے۔

سیکرٹری اوورسیز کے مطابق ملک میں سالانہ سوا چار لاکھ ہنرمند افراد تیار کیے جا رہے ہیں، جبکہ اس سال سوا سات لاکھ افراد بیرونِ ملک گئے۔ انہوں نے نشاندہی کی کہ یونیورسٹی گریجویٹس کی تعداد زیادہ مگر ڈیمانڈ کم ہے، جبکہ بیرونِ ملک اسکلڈ لیبر کی ضرورت زیادہ ہے۔

کمیونٹی ویلفیئر اتاشی، ریاض نے بتایا کہ 28 لاکھ پاکستانی سعودی عرب میں ملازمت کر رہے ہیں، پانچ ہزار غیر قانونی پاکستانیوں کو وطن واپس بھیجا گیا، جبکہ جیلوں میں سزا مکمل کرنے والے 845 افراد کو بھی واپس لایا گیا۔