بانی پی ٹی آئی عمران خان سےآج بھی ملاقات نہ کرنے دی گئی،تینوں بہنوں کا اڈیالہ جیل کے باہردھرنا

فوٹو : فائل

راولپنڈی: سابق وزیراعظم اور بانی پی ٹی آئی عمران خان سےآج بھی ملاقات نہ کرنے دی گئی،تینوں بہنوں کا اڈیالہ جیل کے باہردھرنا،تینوں بہنیں ملاقات کا دن ہونے کے باوجود بھائی سے ملاقات نہ کرنے کےخلاف کارکنوں کے ہمراہ اڈیالہ جیل کے باہر دھرنا دے دیا۔

تحریک انصاف کے بانی سے ملاقات کی اجازت نہ دیئے جانے پرعلیمہ خان نے کہا کہ حکومت بتائے بانی پی ٹی آئی سے آخر فیملی کی ملاقات کیوں نہیں کراتے؟ فوج کے سربراہ پر اگر بات ہوئی تو اس میں کیا مسئلہ ہے؟

علیمہ خان نے اڈیالہ روڈ فیکٹری ناکے پر نورین نیازی کے ہمراہ میڈیا سے گفتگو کرتے ہوئے کہا کہ اگر آج بھی ملاقات نہ کرائی گئی تو ہم سب یہیں پر بیٹھے رہیں گے۔

علیمہ خان نے کہا کہ ہر منگل کو ہمیں یہاں روکا جاتا ہے، ہم کوئی غیر قانونی اور غیر آئینی کام نہیں کر رہے، احتجاج کے علاوہ ہمارے پاس اور کیا راستہ بچا ہے۔

سابق وزیراعظم پاکستان کی بہن کا کہنا تھا کہ بانی کا مطالبہ آئین کی بحالی، جمہوریت کی بحالی اور رول آف لا ہے، افغان ٹریڈ بند ہونے سے کتنے لوگ بے روزگار ہو چکے ہیں، عدلیہ کو آزادی کے دائرے سے ہی باہر نکال دیا گیا۔

بانی پی ٹی آئی عمران خان کی بہنوں،اور مظاہرین کیخلاف آدھی رات واٹر کینن کا استعمال

انہوں نے کہا کہ پاکستان میں حالات بد سے بدترین ہوتے جارہے ہیں، قانون کے مطابق ہمیں ملاقات کی اجازت دے دیں، بانی کو اگر یہاں سے کہیں اور شفٹ کریں گے تو کیا باقی ملک میں سیکورٹی صورتحال بہتر ہے؟

علیمہ خان نے کہا کہ حکومت بتائے میری بہن نے گزشتہ ملاقات پر کیا سیاسی بات کی، سیاسی باتیں تو پارٹی کے لوگوں سے کی جانی چاہیے۔

اس موقع پرنورین نیازی نے گفتگو کرتے ہوئے کہا کہ ہم کوئی دہشتگرد نہیں ہیں، پی ٹی آئی پرامن جماعت ہے، انہوں نے واٹر کینن کا استعمال کرکے ہم لوگوں کو زخمی کیا۔

واضح رہے گزشتہ ملاقات کے دن بھی عمران خان سے اڈیالہ جیل میں ان کی بہنوں کوملاقات کرنے سے روک دیا گیا تھا جس پر تینوں بہنوں نے کارکنوں اور ارکان اسمبلی کے ہمراہ اڈیالہ جیل کے باہردھرنا دیا تھا جنھیں منتشر کرنے کےلئے آدھی رات کو واٹرکینن کااستعمال کیاگیا تھا۔

واٹر کینن کے استعمال سے عمران خان کی بہنیں رات 2 بجے سخت سردی اور پانی کے پریشرکی وجہ سے گرگئی تھیں جب کہ اس دوران پی ٹی آئی کے رکن قومی اسمبلی شاہد خٹک گرگئے جس سے ان کے ٹانگ کی ہڈی ٹوٹ گئی تھی جو کہ اب بھی زیرعلاج ہیں۔