آزاد کشمیر کی 20 رکنی نئی کابینہ نے حلف اٹھا لیا،18 وزرا اور 2 مشیر شامل

فوٹو : سوشل میڈیا

مظفرآباد : آزاد کشمیر کی 20 رکنی نئی کابینہ نے حلف اٹھا لیا،18 وزرا اور 2 مشیر شامل ہیں ایوان صدر مظفر آباد میں ہونے والی تقریب میں حلف اٹھایا۔

آزاد کشمیر جموں و کشمیر اسمبلی کےسپیکر چودھری لطیف اکبر نے نئی کابینہ سے حلف لیا، حلف اٹھانے والوں میں 18 وزراء اور 2 مشیر شامل ہیں، وزیراعظم آزاد کشمیر فیصل ممتاز راٹھور بھی حلف برداری تقریب میں شریک ہوئے۔

تقریب میں سردار فہیم ربانی، چودھری اخلاق، یاسر سلطان، سردار محمد حسین، نبیلہ ایوب، چودھری رشید، چودھری ارشد، جاوید بڈھانوی، جاوید ایوب، قاسم مجید، رفیق نیئر، دیوان چغتائی، ملک ظفر، ضیاء القمر، عامر یاسین ، بازل نقوی، میاں عبد الوحید اور علی شان سونی نے بطور وزراء حلف اٹھایا۔

آزاد کشمیر حکومت کے 2 مشیروں نے بھی اپنے عہدے کا حلف اٹھا لیا، وزیراعظم نے مشیروں سے ان کے عہدے کا حلف لیا۔

چوہدری انوارالحق کیخلاف تحریک عدم اعتماد کامیاب، فیصل راٹھور وزیراعظم آزاد کشمیر منتخب

واضح رہے کہ مشاورتی مراحل مکمل نہ ہونے پر کابینہ کی حلف برداری گزشتہ روز مؤخر کر دی گئی تھی، ابتدائی تجویز میں صرف 10 وزراء شامل کرنے کا فیصلہ رکھا گیا تھا، لیکن یہ تجویز اسمبلی اراکین نے مسترد کر دی۔

 گزشتہ دو روز سے کابینہ کی تشکیل کے حوالے سےمسلسل مشاورت کا عمل جاری رہا جس کے بعد فیصلہ کیا گیا کہ کابینہ 20 رکنی رکھی جائے گی۔

مشاورت کی قیادت پیپلز پارٹی کی رہنما فریال تالپور اور نومنتخب وزیراعظم فیصل ممتاز راٹھور کر رہے تھے، وزراء کی فہرست اور محکموں پر اتفاق رائے کے بعد آج حلف برداری کا فیصلہ کیا گیا ہے۔

آزاد کشمیر اسمبلی میں سابق وزیراعظم انوارالحق کے خلاف عدم اعتماد کی تحریک کے بعد فیصل راٹھور نئے وزیراعظم آزاد کشمیر منتخب ہوئے تھے جھنیں 36 ووٹ ملے تھے۔