پاکستان میں گدھوں کی افزائش کیلئے چینی سرمایہ کاری، 40 فارمز قائم کرنے کا فیصلہ

فوٹو : فائل 

اسلام آباد : پاکستان میں گدھوں کی افزائش نسل بڑھانے کیلئے چین نے بڑی سرمایہ کاری کا عندیہ دے دیا۔ وزارت غذائی تحفظ کے ذرائع کے مطابق چینی کمپنی سنگ ینگ اس منصوبے میں 3 کروڑ 70 لاکھ ڈالر کی سرمایہ کاری کرے گی۔

چینی کمپنیاں ملک بھر میں 40 فارمز قائم کریں گی جن کا مقصد سائنسی اور منظم بنیادوں پر گدھوں کی افزائش کرنا ہے۔

منصوبے کے تحت سالانہ 80 ہزار جانور تیار کرنے کا ہدف رکھا گیا ہے تاکہ پاکستان عالمی سطح پر ایک بڑی سپلائی چین کا حصہ بن سکے۔

ذرائع کے مطابق زرعی یونیورسٹی پشاور میں گدھوں کی افزائش نسل کیلئے خصوصی لیبارٹری بھی قائم کی جائے گی۔ پہلے تین سے پانچ سال کے دوران افزائش میں نمایاں اضافہ متوقع ہے۔

یاد رہے کہ منصوبے کے تحت ہر ماہ 10 ہزار گدھوں کا گوشت چین برآمد کیا جائے گا جبکہ گدھوں کا گوشت اور ہڈیاں صرف برآمد کیلئے استعمال ہوں گی اور ان کی مقامی فروخت پر پابندی ہوگی۔

پاکستان میں گدھوں کی افزائش کیلئے چینی سرمایہ کاری، 40 فارمز قائم کرنے کا فیصلہ