وزیراعلیٰ گلگت بلتستان حاجی گلبر خان سمیت 12 اراکین اسمبلی کی بنیادی رکنیت ختم

فوٹو : سوشل میڈیا

اسلام آباد: پاکستان تحریک انصاف (پی ٹی آئی) نے وزیراعلیٰ گلگت بلتستان حاجی گلبر خان سمیت 12 اراکین اسمبلی کی بنیادی رکنیت ختم کر دی ہے۔

اس سلسلے میں ایڈیشنل سیکرٹری جنرل پی ٹی آئی کی جانب سے نوٹیفکیشن جاری کر دیا گیا، جبکہ پی ٹی آئی کے آفیشل سوشل میڈیا پیجز پر بھی ان منحرف اراکین کی تصاویر شیئر کی گئی ہیں۔

جاری کیے گئے نوٹیفکیشن کے مطابق پارٹی پالیسی کی کھلی خلاف ورزی، فارورڈ بلاک تشکیل دینے اور پارٹی کے خلاف ووٹنگ جیسے سنگین الزامات پر وزیراعلیٰ گلگت بلتستان سمیت 12 اراکین اسمبلی کی بنیادی رکنیت ختم کی گئی۔

نوٹیفکیشن میں واضح کیا گیا ہے کہ جن اراکین کو پارٹی سے نکالا گیا ان میں وزیراعلیٰ جی بی حاجی گلبر خان، شمس الحق لون، راجہ اعظم، عبدالحمید، امجد زیدی، حاجی شاہ بیگ، ثریا زمان، راجہ ناصر مقپون، مشتاق احمد، دلشاد بانو اور فضل رحیم شامل ہیں۔

پی ٹی آئی نے مزید ہدایت کی ہے کہ ان اراکین کو پارٹی کا نام، جھنڈا اور کوئی بھی عہدہ استعمال کرنے کی اجازت نہیں ہوگی۔ اس کے ساتھ ہی پارٹی نے سابق گورنر گلگت بلتستان راجہ جلال حسین مقپون کو بھی شوکاز نوٹس جاری کر دیا ہے۔

سیاسی مبصرین کے مطابق پی ٹی آئی کے اس فیصلے سے گلگت بلتستان اسمبلی میں نئی سیاسی صورتحال پیدا ہو سکتی ہے اور آئندہ دنوں میں فارورڈ بلاک کے اثرات مزید نمایاں ہو سکتے ہیں۔

وزیراعلیٰ گلگت بلتستان حاجی گلبر خان سمیت 12 اراکین اسمبلی کی بنیادی رکنیت ختم