وزیراعظم شہباز شریف کی بیجنگ میں چینی قیادت سے ملاقاتیں، سی پیک فیز-2 اور اقتصادی تعاون پر اہم معاہدے

فوٹو : سوشل میڈیا

بیجنگ : وزیراعظم پاکستان محمد شہباز شریف نے 4 ستمبر 2025 کو بیجنگ میں عوامی جمہوریہ چین کے وزیراعظم لی چیانگ سے ملاقات کی، جس میں دوطرفہ تعلقات کی مثبت رفتار پر اطمینان کا اظہار اور نئے منصوبوں پر مل کر کام کرنے پر اتفاق کیا گیا۔ ملاقات کے بعد وزیراعظم کے اعزاز میں پروقار ظہرانہ بھی دیا گیا۔

ملاقات کے دوران دونوں رہنماؤں نے صدر شی جن پنگ اور وزیراعظم شہباز شریف کی 2 ستمبر کو ہونے والی ملاقات کے فیصلوں کے تناظر میں پاک-چین ہمہ موسمی تزویراتی تعاون پر مبنی شراکت داری کو مزید مضبوط بنانے کے عزم کا اعادہ کیا۔

وزیراعظم نے چین کی جانب سے پاکستان کی علاقائی سالمیت، خودمختاری اور سماجی و اقتصادی ترقی کے لیے مسلسل حمایت پر شکریہ ادا کیا۔

وزیراعظم نے پاکستان کے اقتصادی اصلاحاتی اقدامات کا ذکر کرتے ہوئے کہا کہ ان کے مثبت نتائج چین کی بھرپور حمایت سے ممکن ہو سکے ہیں۔ انہوں نے چینی کیپٹل مارکیٹ میں پانڈا بانڈز متعارف کرانے کے پاکستان کے ارادے سے بھی آگاہ کیا۔

اقتصادی تعاون کے حوالے سے وزیراعظم نے سی پیک کو پاکستان کی ترقی کے لیے ریڑھ کی ہڈی قرار دیتے ہوئے قراقرم ہائی وے، ریلوے لائن-1 کی بحالی اور گوادر پورٹ کے جلد فعال ہونے پر زور دیا۔

دونوں ممالک نے سی پیک فیز-2 کے تحت پانچ نئے اقتصادی راہداریوں پر مشترکہ کام کرنے پر اتفاق کیا۔

وزیراعظم شہباز شریف نے بتایا کہ بیجنگ میں منعقد ہونے والی سرمایہ کاری کانفرنس میں 300 پاکستانی اور 500 چینی کمپنیاں شریک ہوں گی، جبکہ زراعت، کان کنی، ٹیکسٹائل، صنعت اور آئی ٹی کو ترجیحی شعبے قرار دیا گیا ہے۔

پاکستان اور چین نے 2026 میں پاک-چین تعلقات کی 75ویں سالگرہ شاندار انداز میں منانے پر بھی اتفاق کیا۔ اس موقع پر سی پیک فیز-2، سائنس و ٹیکنالوجی، آئی ٹی، میڈیا اور زراعت سمیت مختلف شعبوں میں تعاون بڑھانے کے لیے مفاہمتی یادداشتوں اور معاہدوں پر دستخط بھی کیے گئے۔

ادھر وزیراعظم شہباز شریف سے چین کے وزیر صنعت و انفارمیشن ٹیکنالوجی لی لیچینگ نے ملاقات کی، جس میں وزیراعظم نے صنعت، زراعت، تجارت، کان کنی اور آئی سی ٹی میں تعاون کو مزید گہرا کرنے کے عزم کا اظہار کیا۔

انہوں نے سی پیک فیز-2 میں پیش رفت پر اطمینان ظاہر کرتے ہوئے اسے پاکستان کی سماجی و اقتصادی ترقی کا مرکزی ستون قرار دیا۔

چینی وزیر لی لیچینگ نے وزیراعظم کے اقتصادی اصلاحات کے ایجنڈے کو سراہتے ہوئے کہا کہ چین پاکستان کو آہنی بھائی اور آل ویدر اسٹریٹجک کوآپریٹو پارٹنر سمجھتا ہے، اور دونوں ممالک کے تعلقات کو تعاون و اشتراک کی نئی بلندیوں تک پہنچانے کے لیے پرعزم ہے۔

وزیراعظم شہباز شریف کی بیجنگ میں چینی قیادت سے ملاقاتیں، سی پیک فیز-2 اور اقتصادی تعاون پر اہم معاہدے