محسن نقوی سے امریکی قائم مقام سفیر کی ملاقات، بارڈر سکیورٹی و انسداد منشیات میں تعاون بڑھانے پر اتفاق

فوٹو : فائل

اسلام آباد:وفاقی وزیر داخلہ محسن نقوی سے امریکا کی قائم مقام سفیر نیٹلی بیکر نے ایک اور ملاقات کی ہے، جس میں دوطرفہ تعلقات، مشترکہ دلچسپی کے امور اور تعاون کے نئے امکانات پر تفصیلی تبادلہ خیال کیا گیا۔

ذرائع کے مطابق ملاقات میں پاکستان کو امریکا میں مطلوب شہریوں کا معاملہ بھی زیر بحث آیا، جب کہ بارڈر سکیورٹی، انسدادِ منشیات، کوسٹ گارڈز اور فرانزک کے شعبوں میں باہمی تعاون بڑھانے پر اتفاق کیا گیا۔

قائم مقام امریکی سفیر نیٹلی بیکر نے خیبرپختونخوا اور پنجاب میں حالیہ سیلاب کے باعث ہونے والے جانی و مالی نقصانات پر افسوس کا اظہار کیا اور متاثرہ خاندانوں سے ہمدردی کی۔

اس موقع پر وفاقی وزیر داخلہ محسن نقوی نے کہا کہ امریکی صدر ڈونلڈ ٹرمپ کی جانب سے پاکستان میں تیل کے ذخائر بڑھانے کے لیے مشترکہ کوششوں کا بیان خوش آئند ہے۔ انہوں نے کہا کہ امریکی سرمایہ کاروں کو پاکستان میں تیل سمیت مختلف شعبوں میں سرمایہ کاری کے وسیع مواقع دستیاب ہیں اور حکومت انہیں ہر ممکن سہولت فراہم کرے گی۔

قائم مقام امریکی سفیر نے اس بات پر زور دیا کہ امریکا پاکستان کے ساتھ تعلقات کو خصوصی اہمیت دیتا ہے اور دونوں ممالک کے درمیان تعاون کے نئے مواقع تلاش کیے جا رہے ہیں۔

ملاقات میں وفاقی سیکرٹری داخلہ محمد خرم آغا اور ایڈیشنل سیکرٹری داخلہ میجر جنرل نور ولی خان بھی شریک تھے۔

محسن نقوی سے امریکی قائم مقام سفیر کی ملاقات، بارڈر سکیورٹی و انسداد منشیات میں تعاون بڑھانے پر اتفاق