عمر ایوب، شبلی فراز، زرتاج گل اور دیگر کو 10، 10 برس قید،196 ملزمان کو سزائیں سنا دی گئیں

فوٹو : فائل

فیصل آباد: انسداد دہشت گردی کی خصوصی عدالت نے 9 مئی کے واقعات سے متعلق اہم فیصلہ سنا دیا۔ عدالت نے رانا ثنا اللہ کے گھر پر حملے کے مقدمے میں 59 ملزمان کو 10، 10 سال قید کی سزا سنائی، جبکہ 16 ملزمان کو 3، 3 سال قید کی سزائیں دی گئیں۔ عدالت نے 34 افراد کو ناکافی شواہد کی بنا پر بری بھی کر دیا۔

فیصلے کے مطابق مجموعی طور پر 75 ملزمان کو سزائیں سنائی گئیں، جنہیں ان کی غیر موجودگی میں سزا سنائی گئی۔ سزا پانے والوں میں تحریک انصاف کے کئی مرکزی رہنما بھی شامل ہیں۔

عدالت نے 9 مئی کے جلاؤ گھیراؤ اور توڑ پھوڑ کے مقدمات میں مجموعی طور پر 196 ملزمان کو مختلف سزائیں سنائیں۔

پی ٹی آئی رہنماؤں میں عمر ایوب، شبلی فراز، زرتاج گل، شیخ راشد شفیق، رائے مرتضیٰ اقبال اور کنول شوزب کو 10، 10 سال قید کی سزا سنائی گئی۔ اس کے علاوہ اسماعیل سیلا، عنصر اقبال، بلال اعجاز، اشرف سوہنا، مہر جاوید اور شکیل نیازی کو بھی 10، 10 برس قید کی سزا دی گئی۔

دوسری جانب فواد چوہدری، زین قریشی سمیت 34 افراد کو بری قرار دیا گیا۔ یاد رہے کہ فیصل آباد میں 9 مئی کے واقعات کے بعد جلاؤ گھیراؤ اور توڑ پھوڑ کے الزامات پر 4 مقدمات درج کیے گئے تھے، جن میں سے 3 مقدمات کے فیصلے پہلے ہی سنائے جا چکے تھے۔

چوتھا مقدمہ رانا ثنا اللہ کے گھر پر حملے اور سمن آباد تھانے میں درج توڑ پھوڑ کے کیس سے متعلق تھا، جس میں پی ٹی آئی کی مرکزی قیادت سمیت 109 افراد کو نامزد کیا گیا تھا۔

قانونی ماہرین کے مطابق اس فیصلے کے بعد سزا پانے والے رہنماؤں اور کارکنوں کو اپیل کا حق حاصل ہے۔

عمر ایوب، شبلی فراز، زرتاج گل اور دیگر کو 10، 10 برس قید،196 ملزمان کو سزائیں سنا دی گئیں