فوٹو:فائل
اسلام آباد: سابق وزیراعظم عمران خان کی سپریم کورٹ میں 9 مئی مقدمات میں ضمانت کی سماعت 12 اگست تک ملتوی کردی گئی، عدالت نے یہ سماعت جب مقرر کی تو عمران خان کے وکیل بیرون ملک تھے.
نو مئی واقعات میں بانی پاکستان تحریک انصاف عمران خان کی ضمانت کے معاملے پر سپریم کورٹ میں ہونے والی سماعت وکیل صفائی سلمان صفدر کی درخواست پر ملتوی کر دی گئی۔
چیف جسٹس یحییٰ آفریدی کی سربراہی میں 2 رکنی بنچ نے بانی پی ٹی آئی عمران خان کی اپیلوں پر سماعت کی۔
چیف جسٹس نے سماعت کے آغاز پر کہا کہ کیس میں التوا کی درخواست آئی ہوئی ہے۔
وکیل سلمان اکرم راجہ نے عدالت کو آگاہ کیا کہ سلمان صفدر اس وقت ملک سے باہر ہیں، اس لئے سماعت ملتوی کی جائے، انہوں نے عدالت سے اگلے ہفتے کی تاریخ دینے اور تمام فریقین کو فوری نوٹس جاری کرنے کی استدعا کی۔
عدالت نے اگلے ہفتہ کی تاریخ دینے اور نوٹس کرنے کی استدعا مسترد کرتے ہوئے سماعت 12 اگست تک ملتوی کر دی۔
واضح رہے کہ بانی پی ٹی آئی نے سلمان صفدر کے ذریعے 9 مئی کیسز میں ضمانت بعد از گرفتاری کیلئے اپیلیں دائر کی تھیں، لاہور ہائیکورٹ نے عمران خان کی ضمانت بعد از گرفتاری خارج کی تھیں۔
Comments are closed.