وزیر خزانہ محمد اورنگزیب سے سیکریٹری جنرل ای سی او کی ملاقات ، علاقائی اقتصادی تعاون بڑھانے پر گفتگو

فائل:فوٹو
اسلام آباد:وفاقی وزیرِ خزانہ سینیٹر محمد اورنگزیب سے اقتصادی تعاون تنظیم (ای سی او) کے سیکریٹری جنرل ڈاکٹر اسد مجید خان نے ملاقات کی ہے۔
ملاقات میں دونوں رہنماوٴں نے علاقائی اقتصادی تعاون بڑھانے سے متعلق بات چیت کی۔اس موقع پر ای سی او رکن ممالک کے درمیان تجارت، معیشت اور سیاحت کو فروغ دینے کے لیے مختلف اقدامات پر تبادلہ خیال کیا گیا۔

وزارتِ خزانہ کے اعلامیے کے مطابق ملاقات میں تجارتی راہداریوں اور ابھرتی ہوئی منڈیوں کے تناظر میں علاقائی تجارت اور روابط کی اہمیت پر زور دیا گیا۔

ملاقات کے دوران رکن ممالک کے درمیان تعاون، علاقائی تجارت اور روابط کو مزید مستحکم کرنے کی ضرورت پر اتفاق کیا گیا۔ای سی او کو مزید مضبوط اور متحرک بنانے اور علاقائی تجارت کو فروغ دینے پر بھی فریقین متفق ہوئے۔

وزیرِ خزانہ نے علاقائی تجارت اور روابط کے ایجنڈے کو فروغ دینے کے لیے تعاون کا یقین دلایا۔دونوں جانب سے تنظیم کے مختلف فورمز اور سرگرمیوں میں وزارتِ خزانہ کی نمائندگی کو مزید فعال بنانے پر بھی اتفاق کیا گیا۔