چیف جسٹس یحییٰ آفریدی سے آج پی ٹی آئی کا وفد ملاقات کرے گا

فائل:فوٹو
اسلام آباد:چیف جسٹس آف پاکستان یحییٰ آفریدی سے آج پاکستان تحریک انصاف کا وفد ملاقات کرے گا۔
ذرائع کے مطابق ملاقات چیف جسٹس ہاوٴس اسلام آباد میں ہوگی جس میں اپوزیشن وفد نظام انصاف میں بہتری سے متعلق چیف جسٹس کو تجاویز دے گا۔اپوزیشن وفد سے پہلے وزیر اعظم شہباز شریف کی سربراہی میں حکومتی وفد بھی چیف جسٹس کو مل چکا ہے۔
خیال رہے کہ چیف جسٹس انصاف کی فراہمی کو بہتر بنانے کے لیے قومی عدالتی پالیسی ساز کمیٹی کے حوالے سے تمام سٹیک ہولڈرز سے ملاقات کر رہے ہیں۔
سپریم کورٹ بار نے اصلاحات کے عمل میں چیف جسٹس کو مکمل حمایت کا یقین بھی دلایا ہے۔ انہوں نے کہا ہے کہ انصاف کی فراہمی میں تعاون کے لیے وزیر اعظم اور اپوزیشن رہنماوٴں سے چیف جسٹس کی کاوشوں کو سراہتے ہیں۔
گزشتہ روز، چیف جسٹس یحییٰ آفریدی سے ہزارہ ڈویژن کے سینئروکلاء کی ملاقات بھی ہوئی تھی۔ چیف جسٹس نے وفد کا خیر مقدم کیا اور انصاف تک رسائی کو مضبوط بنانے کے اپنے ہزارہ ڈویژن کے دور دراز علاقوں کا دورہ کرنے کا اعلان کیا۔