ڈونلڈ ٹرمپ کے دور میں پاک امریکہ تعلقات کو نئی تقویت ملے گی، محسن نقوی

فوٹو : سکرین شاٹ

اسلام آباد : وفاقی وزیر داخلہ محسن نقوی سے امریکہ کی قائم مقام سفیر نیٹلی بیکر کی ملاقات ہوئی ہے جس میں پاکستان امریکہ تعلقات، باہمی دلچسپی کے امور سمیت دو طرفہ تعاون بڑھانے پر تبادلہ خیال کیا گیا.

ملاقات میں وزیر داخلہ محسن نقوی کے حالیہ دورہ امریکہ کے حوالے سے بھی بات چیت کی، محسن نقوی نے کہا دورہ امریکہ میں امریکی کانگرس کے اراکین سے ملاقاتیں انتہائی مثبت رہیں۔

محسن نقوی کا کہنا تھا کہ ملاقاتوں میں دہشت گردی کے خلاف مشترکہ لائحۂ عمل ترتیب دینے اور دوطرفہ تعلقات کو مزید آگے بڑھانے پر تفصیلی بات چیت ہوئی۔

انھوں نے کہا کہ دہشتگردی ایک بین الاقوامی مسئلہ ہے، اس سے نمٹنے کیلئے عالمی براداری کو ملکر کام کرنا ہوگا، پاکستان اور امریکہ کے مابین بہترین تعلقات ہیں، جو کئی دہائیوں پر محیط ہیں۔

وزیر داخلہ نے کہا کہ پاکستان کے قانون نافذ کرنے والے اداروں کی استعدادکار بڑھانے میں امریکی تعاون انتہائی اہمیت کا حامل ہے،امید ہے صدر ڈونلڈ ٹرمپ کے دور میں پاک امریکہ تعلقات کو نئی تقویت ملے گی، محسن نقوی کا اظہارِ خیال.

محسن نقوی نے قائمقام امریکی سفیر کو اسلام آباد کے جشن بہاراں پروگرام میں شرکت کی بھی دعوت دی.