لیبیا کے ساحل پرکشتی حادثہ کے 7پاکستانیوں کی شناخت اور تفصیلات سامنے آ گئی

فوٹو: فائل

طرابلس:لیبیا کے ساحل پرکشتی حادثہ کے 7پاکستانیوں کی شناخت اور تفصیلات سامنے آ گئی ہیں،لیبیا کے ساحل پر حادثے کا شکار ہونے والی تارکین وطن کشتی میں جاں بحق ہونے والے پاکستان کے مختلف شہروں سے عرب ممالک پہنچے تھے۔

امیگریشن ذرائع کا کہنا ہے کہ لیبیا کشتی حادثے میں جاں بحق ہونے والوں میں سے 7 پاکستانیوں کی شناخت اور سفری تفصیلات سامنے آگئی۔

ان پاکستانی مسافروں میں سے ایک نے تافتان بارڈر سے جب کہ بقیہ چھ مسافر کراچی، کوئٹہ، پشاور، اسلام آباد اور فیصل آباد ایئر پورٹس سے الگ الگ تاریخوں میں روانہ ہوئے تھے۔

مسافر شعیب حسین 10 جنوری 2025ء کو تافتان بارڈر سے ایران گیا تھا جب کہ مسافر ثقلین حیدر 9 فروری 2024ء کو کراچی ایئر پورٹ سے سعودی عرب پہنچا تھا۔

اسی طرح عابد حسین 25 نومبر 2024ء کو کوئٹہ سے مصر، سراج الدین 31 دسمبر 2022ء کو پشاور سے سعودی عرب، سید شہزاد حسین اسلام آباد سے سعودی عرب پہنچا۔

مسافر شعیب علی 19 نومبر 2024ء کو فیصل آباد سے سعودیہ عرب اور مسرت حسین نے 20 ستمبر کو 2024ء کوئٹہ سے متحدہ عرب امارات کا سفر کیا تھا۔

بعد ازاں یہ تمام مسافر کس طرح ڈوبنے والی کشتی تک پہنچے اور کہاں سے اپنے سفر کا آغاز کیا تھا اس کے بارے میں معلومات جمع کی جا رہی ہیں۔

 دوروز قبل پاکستانیوں کو لے جانے والی ایک اور کشتی لیبیا کے ساحل پرحادثہ کا شکار،65 افراد سوارتھے،ترجمان وزارت خارجہ کی طرف سے کشتی حادثہ کی تصدیق کردی گئی۔

 ترجمان دفتر خارجہ کے مطابق لیبیا میں پاکستانی شہریوں کو لے جانے والی ایک اور کشتی حادثے کا شکار ہوئی ہے۔

ترجمان  نے  بتایا کہ لیبیا کے ساحل کے قریب پاکستانی شہریوں کو لے جانے والی کشتی حادثے کا شکار ہوئی ہے۔

لیبیا میں پاکستانی سفارتخانے کے مطابق 65 مسافروں کو لے جانے والی کشتی مرسا ڈیلا کی بندرگاہ کے قریب الٹی۔

ترجمان دفتر خارجہ کا کہنا ہے کہ طرابلس میں پاکستانی سفارتخانے کی ٹیم زاویہ اسپتال روانہ کر دی گئی ہے، پاکستانی سفارتخانے کی ٹیم مقامی حکام کی معاونت کرے گی۔

وزارت خارجہ کے ترجمان کا کہنا ہے کہ اس حوالے سے کرائسز مینجمنٹ یونٹ متحرک کر دیا گیا ہے اور کشتی حادثے میں متاثرہ پاکستانیوں کی تفصیلات جمع کی جا رہی ہیں۔

دفتر خارجہ نے معلومات اور مدد کیلئے رابطہ نمبر جاری کردیئے، ترجمان کا کہنا ہے کہ معلومات کیلئے پاکستانی سفارت خانہ طرابلس  کے واٹس ایپ نمبر  03052185882 پر رابطہ کیا جاسکتا ہے، سفارتخانے کے موبائل فون نمبر 00218913870577  پر بھی رابطہ کرسکتے ہیں۔

واضح رہے کہ اس سے قبل بھی لیبیا اور مراکش میں غیرقانونی تارکین وطن کی کشتیوں کے حادثے میں درجنوں پاکستانی شہری جاں بحق ہوچکے ہیں۔