توشہ خانہ نیا ریفرنس ، بانی پی ٹی آئی، بشریٰ بی بی کاضمانت کیلئے احتساب عدالت سے رجوع

فائل:فوٹو

اسلام آباد:بانی تحریک انصاف عمران خان اور ان کی اہلیہ بشریٰ بی بی نے توشہ خانہ کے نئے ریفرنس میں ضمانت کیلئے احتساب عدالت میں درخواستیں دائر کردیں۔

بانی پی ٹی آئی عمران خان اور بشریٰ بی بی کی ضمانت بعد ازگرفتاری کی درخواستیں بیرسٹر سلمان صفدر اور خالد یوسف چودھری کے ذریعے دائر کی گئیں۔

اس موقع پر ایڈووکیٹ خالد یوسف چودھری نے کہا کہ توشہ خانہ کیس میں بانی پی ٹی آئی اور بشریٰ بی بی اس وقت جوڈیشل ہیں، نیب توشہ خانہ کیس میں نیا ریفرنس دائر کر چکا ہے، ہماری درخواستوں کی جلد از جلد سماعت کے لئے کل کی تاریخ مقرر کی جائے۔

عدالتی عملے نے کہا کہ کل درخواستیں مقرر نہیں کی جا سکتیں، نیب کو نوٹس بھی کیا جانا ہے، جس پر خالد یوسف چودھری نے کہا کہ پرسوں درخواستیں جیل میں سماعت کے لئے مقرر کردی جائیں، عدالتی عملے نے کہا کہ پرسوں جیل میں 190 ملین کیس کا ٹرائل ہے، اس دن بھی درخواستیں سماعت کیلئے مقرر نہیں کی جا سکتیں۔

بعدازاں عدالت نے نیب توشہ خانہ کیس ٹو کا تمام ریکارڈ طلب کرتے ہوئے نیب کو تمام ریکارڈ کے ہمراہ پیش ہونے کی ہدایت کردی اور عمران خان اور بشریٰ بی بی کی ضمانت کی درخواستیں 30 اگست کو سماعت کیلئے مقرر کردیں۔