ملک کے مختلف حصوں میں مون سون کی بارشوں نے جل تھل ایک کردیا، نشیبی علاقے زیر آب

فائل:فوٹو
لاہور/اسلام آباد: صوبائی دارالحکومت لاہور سمیت ملک کے مختلف حصوں میں مون سون بارشوں نے جل تھل ایک کردیا۔ بارش کا پانی جمع ہونے سے نشیبی علاقے زیر آب آگئے۔
لاہور میں رات گئے لکشمی چوک، مال روڈ، جیل روڈ، باغبانپورہ، تاج پورہ، اقبال ٹاوٴن اور چوبرجی سمیت مختلف علاقوں میں موسلا دھار بارش سے جل تھل ایک ہو گیا۔

صوبائی دارالحکومت میں رات گئے ہونے والی بارش نے رنگ جما دیا، ابر رحمت سے گرمی کی چھٹی ہو گئی جبکہ حبس سے جان چھوٹنے پر شہریوں نے سکھ کا سانس لیا۔

دوسری جانب مریدکے، کندیاں، چشمہ اور نواحی علاقوں میں تیز ہواوٴں کے ساتھ موسلادھار بارش ہوئی جبکہ بلوچستان میں مون سون بارشوں نے تباہی مچا دی ہے، خضدار میں گرج چمک کے ساتھ تیز بارش سے ندی نالوں میں طغیانی آگئی، کچے کے علاقوں میں سیلابی صورتحال برقرار ہے۔

ادھراسلام آباد اور راولپنڈی میں بھی بادل خوب برسے، نشیبی علاقے زیر آب آ گئے، گلی محلوں اور سڑکوں پر پانی جمع ہو گیا جبکہ سندھ میں بارشوں کا زور دار سپیل جاری ہے، کراچی میں وقفے وقفے سے بارش ہو رہی ہے۔

آزاد کشمیر میں بھمبر، کوٹلی میں موسلادھار بارش سے ندی نالوں میں طغیانی ا گئی ہے جبکہ ملحقہ آبادیوں کو محتاط رہنے کی ہدایت کی گئی ہے۔