وزارت مذہبی امور کی 35 پاکستانی حجاج کے انتقال کی تصدیق

فائل:فوٹو

ریاض : وزارت مذہبی امور نے 35 پاکستانی حجاج کے انتقال کی تصدیق کر دی۔ڈی جی حج مشن عبدالوہاب سومرو کاکہناہے کہ عازمین کو بے یارومددگار چھوڑنے کے سوشل میڈیا پر الزامات بے بنیاد ہیں۔

ڈی جی حج مشن عبدالوہاب سومرو کے مطابق 18 جون سہہ پہر 4 بجے تک مشاعر میں 9 پاکستانیوں کی اموات ہوئیں، جن میں 4 منیٰ، 3 عرفات اور 2 مزدلفہ میں اموات ہوئیں۔

ڈی جی حج کاکہنا ہے کہ 20 پاکستانی حجاج کی اموات مکہ میں اور 6 مدینہ میں ہوئی، درجہ حرارت 50 ڈگری ہونے کے سبب یہ ایک مشکل حج تھا، عازمین کو بے یارومددگار چھوڑنے کے سوشل میڈیا پر الزامات بے بنیاد ہیں، ہم سعودی حکومت کی مہیا کردہ معلومات پر بھروسہ کرتے اور بعد ازاں خود بھی تصدیق کرتے ہیں۔

ڈی جی حج عبدالوہاب سومرو نے کہا کسی بھی حاجی کی وفات ہونے کی صورت میں ہمیں اطلاع دی جاتی ہے ، سعودی حکومت نے ایک نظام مرتب کیا ہوا ہے جس کے تحت ورثاء سے باقاعدہ تدفین کی اجازت مانگی جاتی ہے ، اسکے بعد غسل دے کر حرمین میں نماز جنازہ ادا کر کے تدفین کی جاتی ہے یا پھر وارثین کی خواہش کے مطابق کسی حاجی کی میت پاکستان پہنچانے کے انتظامات کیے جاتے ہیں۔ان کا مزید کہنا تھا کہ سعودی حکومت ان معاملات میں ہمارے ساتھ تعاون کرتی ہے۔

خیال رہے کہ مکہ مکرمہ میں رواں حج سیزن کے دوران ہیٹ ویو سے جاں بحق حاجیوں کی تعداد 922 تک پہنچ گئی ہے۔