سعودی سفیر کا ٹی 20 ورلڈکپ جیتنے پر پاکستان ٹیم کیلئے بڑا اعلان

فوٹو: ریڈیو پاکستان

اسلام آباد: سعودی سفیر کا ٹی 20 ورلڈکپ جیتنے پر پاکستان ٹیم کیلئے بڑا اعلان، نواف بن سعید احمد المالکی نے کہا ہے کہ اگر ٹی20 ورلڈکپ جیت گئی تو پاکستان کرکٹ ٹیم اگلے سال حج پر شاہی مہمان ہوگی۔

سعودی عرب کے پاکستان میں متعین سفیر نے ویڈیو پیغام میں انٹرنیشنل کرکٹ کونسل ٹی20 ورلڈکپ 2024 کے لیے پاکستان کرکٹ ٹیم کے لیے نیک خواہشات کا اظہار کیا ہے۔

سعودی عرب کے سفیر نواف بن سعید احمد المالکی نے پاکستان کرکٹ ٹیم کے لیے خصوصی ویڈیو پیغام جاری کیا ہے جس میں پاکستان کرکٹ ٹیم کی جیت کی جواہش ظاہر کی ہے.

سعودی سفیر کا کہنا تھا کہ پاکستانی کرکٹ ٹیم کے اپنے بھائیوں کے لیے میرا پیغام کہ انشااللہ آپ یہ ٹورنامنٹ جیتیں گے، پاکستانی عوام یقیناً ورلڈ کپ میں ٹیم کی کامیابی کا جشن منائیں گے۔

https://x.com/TheRealPCBMedia/status/1797181379551105099?t=p8M7qXeREfaSaEUbkbm22w&s=19

نواف بن سعید احمد المالکی نے کہا کہ میں پاکستان کی خوشحالی اور ترقی کے لیے بھی دعا گو ہوں، آئی سی سی ٹی20 ورلڈ کپ 2024 جیتنے پر پاکستانی ٹیم اگلے برس حج پر شاہی مہمان ہو گی۔

دوسری طرف پاکستان کرکٹ ٹیم انگلینڈ سے ٹی20 سیریز ہارنے کے بعد لندن سے امریکی شہر ڈیلاس پہنچ چکی ہے، جہاں وہ ایک دن آرام کرنے کے بعد آج سے پریکٹس سیشنز کا آغاز کرے گی۔

پاکستان کرکٹ ٹیم اپنے ٹی20 ورلڈکپ مہم کا آغاز 6 جون کو ڈلاس میں میزبان ٹیم امریکا کے خلاف کرے گی، اس کے بعد 9، 11 اور 16 جون کو بالترتیب بھارت، کینیڈا اور آئرلینڈ کے خلاف میچزکھیلے گی.

گروپ اسٹیج کے بعد، گروپ کی ٹاپ دو ٹیمیں سپر 8 مرحلے کے لیے ویسٹ انڈیز جائیں گی پاکستان کو امریکہ پہنچ کر تیاری کیلئے زیادہ وقت نہیں ملا ہے.