خوشاب میں ٹرک کھائی میں گرنے سے ایک ہی خاندان کے 13 افراد جاں بحق

فائل:فوٹو

خوشاب: خوشاب میں ٹرک کھائی میں گرنے سے 13 افراد جاں بحق، 9 زخمی ہو گئے۔مرنے والوں میں 5 خواتین بھی شامل ہیں۔

ریسکیو ذرائع کے مطابق مرنے والوں کا تعلق ایک ہی خاندان سے ہے ، بدقسمت خاندان بنوں سے مزدوری کے لیے منی ٹرک میں سوار ہوکر خوشاب آ رہا تھا ، بریک فیل ہونے سے گاڑی کھائی میں جاگری، مرنے والوں میں 5 خواتین بھی شامل ہیں۔

ذرائع کا مزید کہنا تھا کہ مرنے والوں اور زخمیوں کو ٹی ایچ کیو ہسپتال نوشہرہ منتقل کردیاگیا، مرنے والوں کی لاشیں قانونی کارروائی کے بعد ورثا کے حوالے کی جائیں گی۔

دوسری جانب وزیراعلیٰ پنجاب مریم نواز نے خوشاب وادی سون میں ٹرک کھائی میں گرنے سے ایک ہی خاندان کے 13افراد کے جاں بحق ہونے پر اظہارِ افسوس کیا ہے،انہوں نے اپنے تعزیتی پیغام میں سوگوار خاندان سے اظہار ہمدردی اور زخمی افراد کو بہترین طبی امداد فراہم کی ہدایت کی ہے۔