پاکستان میں بھی پیر کو ہندو برادری نے اپنامذہبی تہوار ہولی منایا

فائل:فوٹو
کراچی: پاکستان میں بھی پیر کو ہندو برادری نے اپنامذہبی تہوار ہولی منایا، کراچی سمیت کئی شہروں میں ہولی کی مناسبت سے تقریبات ہوئیں۔

بہار کے موسم کی آمد پر منائے جانے والے ہندووٴں کے مذہبی تہوار ہولی کو ’رنگوں کا تہوار‘ بھی کہا جاتا ہے، ہولی کی تقریبات دو دن چلتی ہیں، پہلے دن مختلف رسومات ادا ہوتی ہیں اور دوسرے دن رنگ بکھیرے جاتے ہیں، بچے اور بڑے ایک دوسرے پر رنگ پھینکتے ہیں۔

ملک بھر بالخصوص صوبہ سندھ کے علاقوں مٹھی، حیدرآباد، جیکب آباد، تھرپارکر میں ہولی کی تقریب میں ہندووٴں کیساتھ مسلم برادری کے افراد شرکت کر کے رواداری اور مذہبی ہم آہنگی کا اظہار کرتے ہیں۔

دوسری جانب صدر آصف علی زرداری نے ہولی پر ہندو برادری کو مبارکباد دیتے ہوئے کہا کہ ملک کیلئے پاکستانی ہندو برادری کی خدمات قابل ستائش ہیں، پاکستان کا آئین مذہبی آزادی کی ضمانت دیتا ہے، پاکستان تمام مذاہب سے تعلق رکھنے والے لوگوں کا ایک خوبصورت گلدستہ ہے۔

ادھر وزیر اعلیٰ پنجاب مریم نواز نے ہندو برادری سے تعلق رکھنے والے 700 خاندانوں کو ”ہولی“ کے موقع ہولی پیکیج دینے کا اعلان کر دیا، ہولی کی خوشیاں دوبالا کرنے کیلئے فی کس 10 ہزار روپے دیئے جائیں گے، فنڈز کا اجراء کر کے متعلقہ ڈپٹی کمشنرز تک پہنچا دیا گیا۔

وزیر اعلیٰ ہاوٴس نے مزید بتایا کہ پیکیج کے اعلان میں مسلم لیگ (ن) کی راحیلہ خادم حسین اور پنجاب کمیٹی ممبران کی خصوصی کاوش شامل ہے، یہ حکومت ہر شہری اور ہر فرد کی نمائندہ حکومت ہے۔