غیرملکی صحافیوں، ڈیفنس اتاشیوں اورسفیروں کابالاکوٹ کا دورہ

فوٹو: آئی ایس پی آر

راولپنڈی(زمینی حقائق )مختلف ممالک کے سفیروں، ڈیفنس اتاشیوں اور بین الاقوامی صحافیوں کے وفد نے بالا کوٹ کے علاقے جابہ کا دورہ کیا۔

آئی ایس پی آرکے مطابق بالاکوٹ کا دورہ کرنے والے وفد میں بین الاقوامی میڈیا کے نمائندوں کا ایک گروپ بھی تھا جس میں بھارت میں مقیم مغربی میڈیا کے نمائندے شامل تھے۔

آئی ایس پی آر اعلامیہ میں کہا گیا ہے کہ صحافیوں اور سفارتکاروں نے جابہ میں خود زمینی حقائق کا جائزہ لیا، وفد نے جائزہ لیا کہ جابہ میں زمینی حقائق بھارتی دعووں کے برعکس ہیں۔

آئی ایس پی آر کا کہنا ہے کہ وفد کو بالا کوٹ حملے سے متعلق جھوٹے بھارتی دعوؤں اور پاکستانی مؤقف سے آگاہ کیا گیا۔

وفد نے اس مدرسے کا بھی دورہ کیا جس کے حوالے سے بھارت نے جھوٹا دعویٰ کیا تھا کہ فضائی حملے میں کئی دہشت گردوں کو ہلاک کیا گیا ہے۔

وفد نے مدرسے میں طالبعلموں اور اساتذہ سے آزادانہ گفتگو کی اور مدرسے کو اپنی جگہ صحیح سلامت موجود پایا جہاں مقامی طلبہ تعلیم حاصل کررہےہیں۔

اس موقع پر ڈائریکٹر جنرل آئی ایس پی آر میجر جنرل آصف غفور کا کہنا تھا کہ بھارت مقبوضہ کشمیر میں انسانی حقوق کی خلاف ورزیاں کر رہا ہے اور بھارت کے ایسے اقدامات سے خطے کا امن خطرے میں ہے۔

آئی ایس پی آر کے مطابق بعد ازاں وفد نے سوات میں تعلیمی سہولیات، مالاکنڈ میں بحالی مرکز کا بھی دورہ کیا۔

یاد رہے کہ 26 فروری کو بھارتی طیاروں نے دراندازی کی کوشش تھی لیکن پاک فضائیہ کے بروقت اور مؤثر جواب کے باعث بدحواس بھارتی طیارے اپنے ایمونیشن بالاکوٹ کے قریب گرا کر فرار ہوگئے تھے۔

اس واقعے پر بھارت نے دہشت گردوں کو مارنے کا جھوٹا دعویٰ کیا تھا جس کا ثبوت آج تک نہیں پیش کرسکا۔