صندل خٹک اور حریم شاہ کیخلاف پی ٹی اے کو کارروائی کا مطالبہ کرناپڑ گیا

فوٹو : فائل

اسلام آباد(ویب ڈیسک)سوشل میڈیا پر شہرت پانے والی ٹک ٹاک ماڈلز حریم شاہ اور صندل خٹک کے خلاف کارروائی کے لئے ُ’پاکستان ٹیلی کمیونی کیشن‘ نے چین کی ویڈیو شیئرنگ ایپلی کیشن ٹک ٹاک سے رجوع کر لیا.

حریم شاہ اور صندل خٹک کے ٹک ٹاک اکاؤنٹ پر کئی متنازع ویڈیوز اپ لوڈ کیے جانے کے بعد پی ٹی اے نے ٹک ٹاک انتظامیہ سے رابطہ کیا، اس حوالے سے اردو نیوز کے مطابق پی ٹی اے نے مذکورہ ماڈلز کے خلاف متعدد تحریری شکایات موصول ہونے کے بعد ٹک ٹاک انتظامیہ سے  یہ مطالبہ کیا۔

رپورٹ کے مطابق پی ٹی اے حکام نے اس بات کی تصدیق کی کہ انہوں نے ٹک ٹاک انتظامیہ کو دونوں ماڈلز کے خلاف کارروائی کرنے کے حوالے سے خط بھیج دیا۔

پی ٹی اے نے اس بات کی وضاحت نہیں کی کہ حکومت پاکستان نے ٹک ٹاک انتظامیہ سے ماڈلز کے خلاف کس طرح کی کارروائی کا مطالبہ کیا ہے مگرتاحال ٹک ٹاک انتظامیہ نے پاکستانی درخواست کا کوئی جواب نہیں دیا اور نہ ہی تاحال دونوں ماڈلز کے اکاؤنٹس معطل کئے ہیں ۔

اگرچہ پی ٹی اے نے پہلے بھی ٹک ٹاک انتظامیہ سے متنازع ویڈیوز ہٹانے کے مطالبات کیے ہیں تاہم یہ پہلا موقع ہے کہ حکومت نے ویڈیو شیئرنگ ایپ سے حریم شاہ اور صندل خٹک کے خلاف کارروائی کا مطالبہ کیا ہے۔

پی ٹی اے نے دونوں اسٹارز کے خلاف کارروائی کا مطالبہ ایک ایسے وقت میں کیا ہے جب کہ دونوں ماڈلز کے خلاف سیاستدان بھی کارروائی کرنے کا مطالبہ کرتے دکھائی دیتے ہیں۔

اس سے قبل ایف آئی اے کی جانب سے بھی دونوں ماڈلز کے خلاف تحقیقات کے آغاز کیے جانے کی خبریں سامنے آئی تھیں۔
اور تحقیقات کے حوالے سے 16 جنوری کو صندل خٹک نے لاہور کی سیشن کورٹ میں ایک درخواست بھی جمع کرائی تھی۔

عدالت میں جمع کرائی گئی درخواست میں صندل نےدعویٰ کیا تھا کہ ایف آئی اے انہیں ہراساں کر رہی ہے اور انہیں یہ بھی نہیں بتایا جا رہا ہے کہ ان کے خلاف کس الزام کے تحت تحقیقات ہو رہی ہیں۔

صندل خٹک کی جانب سے دائر کی گئی درخواست میں کہا گیا تھا کہ ایف آئی اے نے انہیں 2 بار گزشتہ سال اکتوبر اور نومبر میں تفتیش کے لیے ایف آئی اے پیش ہونے کا کہا تھا اور انہیں یہ نہیں بتایا گیا تھا کہ ان کے خلاف کس چیز کی تحقیقات کی جا رہی ہے۔

صندل خٹک نے عدالت سے درخواست کی تھی کہ ایف آئی اے سے ان کے خلاف تحقیقات کرنے کی دستاویزات طلب کی جائیں اور وفاقی تحقیقاتی ادارے کو انہیں ہراساں کرنے سے روکا جائے۔

عدالت نے صندل خٹک کی درخواست پر ایف آئی اے کو آئندہ ماہ 4 فروری کو طلبی کا نوٹس جاری کیا ہوا ہے، واضح رہے کہ صندل خٹک ساتھی ماڈل حریم شاہ کے ساتھ متنازع ویڈیوز بنانے کے حوالے سے ملک بھر میں شہرت رکھتی ہیں۔

دونوں ماڈلز کئی سیاسی رہنماؤں اور دیگر اہم شخصیات کے ساتھ متنازع ویڈیوز بناتی نظر آتی ہیں جب کہ حریم شاہ کی دفتر خارجہ میں بنائی گئی ویڈیو نے بھی ملک میں ایک ہنگامہ کھڑا کردیا تھا۔

اس سے قبل دونوں ماڈلز کی اینکر پرسن مبشر لقمان کے نجی طیارے پر بنائی گئی ویڈیوز پر تنازع ہوا تھا جب کہ دونوں ماڈلز دیگر افراد کے ساتھ بھی ویڈیوز بناتی رہتی ہیں۔

کچھ دن قبل ہی حریم شاہ اور صندل خٹک کے حوالے سے اینکر پرسن مبشر لقمان نے اپنے یوٹیوب پروگرام میں ایک دوسرے صحافی کے ساتھ کئی انکشافات کیے تھے اور دعویٰ کیا تھا کہ ماڈلز کے پاس وفاقی وزیر چوہدری فواد حسین اور ایک خاتون وفاقی وزیر کی قابل اعتراض ویڈیوز موجود ہیں۔

اس کے جواب میں مذکورہ پروگرام کے بعد چوہدری فواد حسین نے مبشر لقمان کو شادی کی ایک تقریب میں تھپڑ بھی رسید کردیا تھا۔

صندل خٹک اور حریم شاہ نے ٹوئٹر پر خود بتایا ہے کہ وہ کینیڈا میں پہنچ کر ایک یوٹیوب چینل شروع کررہی ہیں جس پر وہ پاکستان میں بنائی گئی ویڈیوز شیئر کریں گی.