لیگی رہنماوں کی لاہور میں درج مقدمات پر اسلام آباد ہائیکورٹ سے ضمانت منظور

اسلام آباد: لیگی رہنماوں کی لاہور میں درج مقدمات پر اسلام آباد ہائیکورٹ سے ضمانت منظور، عدالت نے پنجاب اسمبلی ہنگامہ آرائی کیس میں عطاء اللہ تارڑ سمیت مسلم لیگ ن کے 14 رہنماؤں کی حفاظتی ضمانت منظور کی۔

اسلام آباد ہائی کورٹ کے قائم مقام چیف جسٹس عامر فاروق نے کیس کی سماعت کی، عدالت عالیہ نے مسلم لیگ ن کے 14 رہنماوں کی 14 روزہ حفاظتی ضمانت منظور کی۔

عدالت کی طرف سے 25، 25 ہزار روپے کے مچلکوں کے عوض ضمانت منظور کرتے ہوئے ن لیگی رہنماوں کو ضمانتی مچلکے جمع کرانے کا حکم دیا گیا۔

حفاظتی ضمانت منظور ہونیوالوں میں عطا تارڑ اویس لغاری، رانا مشہود دیگر ن لیگی رہنما شامل ہیں،عدالت نے دو ہفتے تک پنجاب پولیس کو لیگی رہنماؤں کی گرفتاری سے روک دیا۔

حفاظتی ضمانت ملنے کے بعد پنجا ب پولیس 14روز تک ان کو گرفتار نہیں کرسکتی تاہم متعلقہ عدالت میں پیش ہونے پر عبوری ضمانتوں کے کنفرم ہونے یا مسترد ہونے کا فیصلہ کیا جائے گا۔