شہباز گل کی پمز اسپتال میں کھانا کھاتے ہوئے ویڈیو جاری

اسلام آباد: تحریک انصاف کے چیئرمین عمران خان کے چیف آف اسٹاف شہباز گل کی پمز ہسپتال میں کھانا کھاتے ہوئے ایک اور ویڈیو جاری کردی گئی۔

نئی ویڈیو میں بھی شہباز گل ڈاکٹرز سے تکرار کرتے نظر آرہے ہیں۔ شہباز گل کہہ رہے ہیں کہ میں نے ناشتہ کر لیا، زیادہ نہ کھلاوٴ، آپ بھی اتنا ہی کھاتے پیتے ہو، اب آپ کو پیچھے سے حکم ملا ہے تو یہ کررہے ہیں۔

شہباز گل نے کہا کہ میں بطور احتجاج کھا رہا ہوں، آپ زبردستی کررہے ہیں، میری مرضی ہے کہ میں نے کھانا کھانا ہے یا نہیں، میں شوگر کا مریض ہوں،جوس نہیں پی سکتا، دلیہ کھا لیا، جوس پی لیا اور نہیں کھا سکتا، میں لسی نہیں پی سکتا، پیٹ خراب ہوجاتا ہے۔

شہباز گل نے کہا کہ آپ نے مجھے پکڑ کر میری داڑھی صاف کرا دی،یہ درست نہیں ہے، یہ میرے ساتھ زبردستی کررہے ہیں،آپ ہراساں کرکے مجھے کھلا رہے ہیں۔

شہباز گل کی نئی ویڈیو جاری کردی گئی۔۔!!pic.twitter.com/SkTzrNA9yv

— Mughees Ali (@mugheesali81) August 22, 2022

دوسری جانب شہباز گل کو پمز ہسپتال سے ڈسچارج کر دیا گیا ہے۔ ڈاکٹرز نے کہا ہے کہ شہباز گل کی تمام کلینکل رپورٹس تسلی بخش ہیں ، انہیں سانس لینے میں کوئی دشوار ی نہیں، میڈیکل بورڈ نے کلینکل رپورٹس کاجائزہ لینے کے بعد ڈسچارج کرنے کافیصلہ کیا۔

ڈاکٹرز نے بتایا کہ شہباز گل نے صبح ناشتہ کیا اورجوس بھی پیا ، سانس کی رکاوٹ دورکرنے کے لئے شہبازگل کو مسلسل نیبولائز کرتے رہے ہیں۔