سائنس دانوں کی بالاآخر سب سے اونچے درخت تک رسائی

فائل:فوٹو

برازیلیا: کیمبرج محققین کی نشان دہی کے تین سال بعد سائنس دان بالاآخر ایمازون کے جنگلات میں موجود سب سے اونچے درخت پر پہنچ گئے۔

شمالی برازیل میں موجود یہ دیو ہیکل درخت 290 فِٹ لمبا ہے اور 32 فِٹ قطر پر پھیلا ہوا ہے۔

سائنس دانوں نے LIDAR ٹیکنالوجی کا استعمال کرتے ہوئے درخت کو 2019 میں دریافت کیا تھا۔ لیکن اس ہی برس درخت تک پہنچنے کی پیدل مہم ناکام ہوگئی تھی۔

LIDAR ایک ایسا طریقہ ہے جس میں ایک ایئر کرافٹ پر نصب لیزر اسکینر کا استعمال کرتے ہوئے زمین کا جائزہ لیا جاتا ہے۔

مہم کے ناکام ہونے کے باوجود یونیورسٹی آف کیمبرج نے پریس ریلیز جاری کی جس کے ساتھ محققین کے اس خطے میں موجود دیگر قدآور درختوں پر چڑھنے کی ویڈیو اور تصاویر پیش کی گئیں۔

تین سال کی منصوبہ بندی، پانچ سال کی مہم اور دو ہفتوں تک گھنے جنگل میں چلنے کے بعد ماہرین اب جا کر اس دیو ہیکل درخت تک پہنچے ہیں۔

اس سفر میں محققین نے جری دریا کے تیز دھارے کا تقریباً 483 کلو میٹر کا فاصلہ عبور کیا جبکہ 40.2 کلو میٹر ایسے جنگلات میں چلے جہاں اس سے قبل کوئی آدمی نہیں گیا تھا۔