اسلام آباد(ویب ڈیسک) سابق وزیراعظم نواز شریف کے سابق معاون خصوصی عرفان صدیقی کو کرایہ داری ایکٹ کی خلاف ورزی کرنے پر گرفتار کرکے تھانے منتقل کر دیاگیا۔
اس حوالے سے نجی ٹی وی جیونیوز نے پولیس ذرائع سے خبر دی ہے کہ رات گئے عرفان صدیقی کو کرایہ داری ایکٹ کی خلاف ورزی کرنے پر گرفتار کر کے اسلام آباد کے تھانہ رمنا منتقل کردیا گیا ہے ۔
پولیس ذرائع کا کہنا ہے کہ عرفان صدیقی نے گھر کرائے پر دے رکھا تھا، انہوں نے کرایہ داری پر عمل درآمد نہ کیا اور نہ ہی پولیس اسٹیشن میں اس کا اندراج کروایا۔
عرفان صدیقی کے ساتھ اقبال نامی شخص کو بھی حراست میں لیا گیا ہے۔ذرائع کے مطابق عرفان صدیقی کو گرفتار کر کے سیکشن 188 کے تحت مقدمہ درج کر لیا گیا ہے۔
قانونی ماہرین کا کہنا ہے کہ مذکورہ سیکشن قابل ضمانت ہے تاہم اس کی ضمانت عمومی طور پر اسسٹنٹ کمشنر ہی لیتا ہے ۔
