پاکستان نے دہشت گردی سے متعلق امریکی رپورٹ مسترد کردی

فائل:فوٹو

اسلام آباد:پاکستان نے دہشت گردی سے متعلق امریکی رپورٹ مسترد کردی، ترجمان دفتر خارجہ ممتاز زہرا بلوچ کاکہناہے کہ پاکستان نے دہشت گردی اور اس کی مالی معاونت کے خلاف جو اقدامات کئے انہیں دنیا نے تسلیم کیا۔

ہفتہ وار بریفنگ کے دوران ترجمان ممتاز زہرہ بلوچ کا کہنا تھا جو بیانات ڈاکٹر عافیہ کے حوالے سے دئیے گئے ہیں وہ سنجیدہ نوعیت کے ہیں وزیر اعظم نے ہدایت دی ہے کہ یہ معاملہ امریکی محکمہ خارجہ سے اٹھا کر اسکی تحقیقات کرائی جائیں ، ڈاکٹر عافیہ صدیقی اور تمام پاکستانیوں کی خیریت ہماری اولین ترجیح ہے۔

ایک سوال پر ان کا کہنا تھا سابق معاون خصوصی شہزاد اکبر پر حملے کے حوالے سے پاکستانی ہائی کمیشن سے مدد نہیں لی اس واقعے میں پاکستانی ایجنسیوں کے ملوث ہونے کے الزامات کو سختی سے مسترد کرتے ہیں ،افغان وزیر کے پاکستانی پاسپورٹ کے استعمال کے بارے میں ابھی رپورٹ دیکھی ہے۔اس پر حقائق سامنے آنے کے بعد جواب دیا جائے گا۔
ترجمان نے کہا کہ امت شاہ سمیت کشمیر کے حوالے سے بھارتی قیادت کے غیر ذمہ دارانہ بیانات قابل مذمت ہیں کشمیر اقوام متحدہ کے ایجنڈے پر حل طلب مسئلہ کے طور پر موجود ہے۔
ترجمان نے بتایا رواں ہفتے امریکی وفود کے دوروں کا سلسلہ جاری ہے ان دوروں کا مرکز صرف افغانستان نہیں ہے ، پاکستان غزہ میں اسرائیل کی جانب سے سویلین اہداف کے خلاف طاقت کے استعمال کی شدید مذمت کرتا ہے ، اقوام متحدہ سیکرٹری جنرل کے مطابق غزہ میں شہریوں کو شدید خطرات لاحق ہیں۔

انہوں نے کہا کہ پاکستان اسرائیل کی طرف سے غزہ میں جاری طاقت کے مسلسل استعمال کی مذمت کرتا ہے ، غزہ میں صورتحال تیزی سے خراب ہورہی ہے ، اقوام متحدہ کے سیکرٹری جنرل کی طرف سے اس صورتحال کو ختم کرنے کی آواز کیساتھ ہیں ،اقوام متحدہ آرٹیکل 99 امن و سلامتی کے حوالے سے اقوام متحدہ سیکرٹری جنرل کے اختیارات کا ضامن ہے۔