سابق امریکی وزیر خارجہ ہنری کسینجر انتقال کرگئے

فائل:فوٹو
نیویارک : سابق امریکی وزیر خارجہ ہنری کسینجر انتقال کرگئے۔ان کی عمر 100برس تھی۔ہنری کسینجر کو امریکی خارجہ پالیسی کی طاقت کا مرکز تصور کیا جاتا تھا، اس وجہ سے وہ متنازع بھی رہے۔

غیرملکی خبررساں ادارے کے مطابق ہنری کسینجر کاانتقال ان کی رہائشگاہ کنیکٹی کٹ میں ہوا ،ان کی آخری رسومات کے لیے اہل خانہ کی جانب سے نجی طور پر اہتمام کیا جائے گا، بعدازاں یادگاری تقریب نیویارک میں منعقد کی جائے گی۔

ہنری کسنجر 100 برس کی عمر میں آخری وقت تک انتہائی فعال رہے اور وائٹ ہاوٴس کے اجلاسوں میں شریک ہوتے رہے، آنجہانی نے رواں برس جولائی میں بیجنگ کا دورہ کیا تھا جہاں ان کی ملاقات چینی صدر شی جن پنگ سے ہوئی۔

چین کے ساتھ امریکا کے تعلقات ہنری کسینجر کی سب سے یادگار میراث میں سے ایک ہے، سوویت یونین کے خلاف سرد جنگ کے پیشِ نظر وہ خفیہ طور پر چین گئے تھے جس کا نتیجہ 1972 میں امریکی صدر رچرڈ نکسن کے تاریخی دورہ چین اور بعدازاں چین کے ساتھ امریکی تعلقات کے قیام کی صورت میں نکلا۔

ہنری کسینجر کو امریکی خارجہ پالیسی کی طاقت کا مرکز تصور کیا جاتا تھا، اس وجہ سے وہ متنازع بھی رہے۔کئی کتابوں کے مصنف بھی تھے ۔

ہنری کسینجر نے سیکریٹری آف سٹیٹ اور نیشنل سکیورٹی ایڈوائزر کے طور پر بھی خدمات سرانجام دیں، اْن کو ویتنام کی جنگ کے خاتمے کے لیے مذاکرات پر نوبل پرائز سے بھی نوازا گیا۔