فواد چوہدری کو جیل میں اہلیہ حبہ چوہدری سے علیحدہ ملاقات کی اجازت

فائل:فوٹو

اسلام آباد: اسلام آباد ہائیکورٹ نے سابق وفاقی وزیر فواد چوہدری کو جیل میں اہلیہ حبہ چوہدری سے علیحدہ ملاقات کی اجازت مل گئی۔عدالت نے جیل مینوئل کے مطابق طبی سہولیات بھی فراہم کرنے کا حکم دے دیا۔

اسلام آباد ہائیکورٹ کے جسٹس میاں گل حسن اورنگزیب نے فواد چوہدری کی جیل میں سہولیات، وکلاء اور فیملی سے ملاقات کی اجازت کی درخواست پر سماعت کی جس سلسلے میں عدالتی حکم پر چیف کمشنر اسلام آباد کیپٹن ریٹائرڈ انوار الحق عدالت میں پیش ہوئے اور درخواست پر عملدرآمد رپورٹ جمع کروا دی۔

جیل میں کلاس بی

چیف کمشنر نے عدالت کو بتایا کہ فواد چودھری کو جیل میں بہتر کلاس بی بھی دے دی گئی ہے۔

جسٹس میاں گل حسن نے ڈپٹی سپرنٹنڈنٹ اڈیالہ جیل سے مکالمہ کیا کہ ڈپٹی سپرنٹنڈنٹ صاحب! درخواست گزار کا وقار ملحوظ خاطررکھا جائے، آصف زرداری اور بینظیر بھٹو کو بھی فیملی اور وکلا سے ملاقات سے روکا جاتا تھا، ایسے واقعات آپ کے افسروں کے لیے شرمندگی کا باعث بنتے ہیں۔

بعدازاں عدالت نے فواد چوہدری کی اہلیہ حبہ چوہدری سے جیل میں علیحدگی میں ملاقات کرانے کی اجازت دی اور انہیں جیل مینوئل کے مطابق طبی سہولیات بھی فراہم کرنے کا حکم دیا ہے۔