ہم بطور ٹیم اچھا نہیں کھیلے صرف کپتان نہیں ہم سب ذمے دار ہیں

اسلام آباد: پاکستان کی ورلڈ کپ میں بری کارکردگی کا ذمہ دار میں ہوں، شاداب خان نے بطور نائب کپتان ذمہ داری قبول کرتے ہوے کہا کہ  میں سمجھتا ہوں کہ میرے پرفارم نہ کرنے سے ٹیم یہاں پہنچی۔

 وہ پاکستان کی کارکردگی کے حوالے سے بھارت میں میڈیا سے گفتگو کررہے تھے، شاداب خان نے کہا کہ میں اپنے آپ سے بھی مایوس ہوں، میں توقعات پر پورا نہیں اترا، مجھے پرفارم کرنا چاہیے تھا۔

نائب کپتان نے کہا کہ کرکٹ میں یہ ہی سبق ہے کہ ہمیشہ بہتر ہونا ہے، ہر ٹورنامنٹ میں جیت کی کوشش کرتے ہیں، پوری ٹیم اور کوچنگ اسٹاف ہر کوئی مایوس ہے۔

شاداب خان کا کہنا ہے کہ اگر میں بطور بولر پرفارم کر پاتا تو رزلٹ مختلف ہوسکتا تھا، میرا پرفارم کرنا بہت ضروری ہے، واپس جا کر تجزیہ کروں گا کہ کیا کیا غلطیاں ہوئیں۔

قومی ٹیم کے نائب کپتان نے کہا کہ ہماری کافی غلطیاں اور کمزوریاں رہیں اس لیے باہر ہوئے، ہم تینوں شعبوں میں ناکام رہے لیکن خاص طور پر بولرز پرفارم نہ کر سکے، بیٹنگ میں بھی ہمیں ماڈرن ڈے کرکٹ کے مطابق کھیلنا ہو گا۔

شادات خان نے کہا ہمارا کلچر ہی ایسا ہے کہ ہر چیز کپتان پر ڈال دی جائے، ہم بطور ٹیم اچھا نہیں کھیلے صرف کپتان نہیں ہم سب ذمے دار ہیں، صرف کپتان جیت یا ہار کا ذمے دار نہیں ہوتا، سب کا کردار ہوتا ہے۔